نئی دہلی/ آواز دی وائس

پاکستان ہے کہ دہشت گردی پر اپنی حرکتوں سے باز آنے کا نام نہیں لیتا۔ تازہ مثال پہلگام حملے کی ہے۔ پوری دنیا نے دیکھا کہ کس طرح پاکستان کے حمایت یافتہ دہشت گردوں نے 26 معصوم سیاحوں کو نشانہ بنایا۔ دہشت گردی ایک ایسا مسئلہ ہے جس پر ہندوستان بار بار پاکستان کو خبردار کرتا رہا ہے، لیکن وہ ہے کہ سدھرنے کا نام نہیں لیتا۔ ہندوستان نے اقوام متحدہ میں بھی بارہا پاکستان کو دہشت گردی کے مسئلے پر نہ صرف آگاہ کیا ہے بلکہ بے نقاب بھی کیا ہے اور اسے دوٹوک جواب دیا ہے۔

یہ بات قابل ذکر ہے کہ ہندوستان اور پاکستان کے درمیان کشمیر اور سرحد پار دہشت گردی کے مسئلے پر ایک طویل اور متنازعہ تاریخ رہی ہے۔ ہندوستان نے دہشت گردی کو فروغ دینے میں پاکستان کے کردار اور کشمیر پر اس کے موقف کو دنیا کے سامنے اجاگر کرنے کے لیے اقوام متحدہ کے مختلف پلیٹ فارمز کا مستقل استعمال کیا ہے۔ ہندوستان نے کب کب پاکستان کا چہرہ بے نقاب کیا، آئیے تفصیل سے جانتے ہیں:

ہندوستان نے ایک بار پھر اقوام متحدہ میں پاکستان کو دوٹوک جواب دیا

ہندوستان نے واضح کیا کہ آپریشن سندور کے بعد پیدا شدہ حالات میں پاکستان کی فوج کے مطالبے پر ہی ہماری فوج سیز فائر پر آمادہ ہوئی تھی۔ آپریشن سندور کا جو مقصد تھا، وہ حاصل ہو چکا تھا۔

۔1948 میں کشمیر کا مسئلہ اقوام متحدہ میں اٹھایا گیا

کشمیر کے مسئلے کو پہلی بار جنوری 1948 میں ہندوستان نے اقوام متحدہ کی سلامتی کونسل میں اٹھایا تھا۔ تب سے یہ مسئلہ مسلسل چل رہا ہے۔ ہندوستان بار بار کہتا رہا ہے کہ کشمیر کے کچھ حصوں پر پاکستان کا قبضہ غیر قانونی ہے، جب کہ پاکستان اقوام متحدہ کی قراردادوں کے تحت کشمیریوں کے حق خود ارادیت پر زور دیتا رہا ہے۔

سندھ طاس معاہدے پر بھی پاکستان کو دوٹوک جواب

ہندوستان کے مستقل نمائندے، سفیر پروتھانی ہریش نے جولائی 2025 میں اقوام متحدہ کی سلامتی کونسل میں کشمیر اور سندھ طاس معاہدے پر پاکستان کے تبصروں کی سختی سے تردید کی تھی۔ اس وقت سلامتی کونسل کی صدارت سنبھالے ہوئے پاکستان نے مختلف مباحثوں میں کشمیر کا مسئلہ اٹھانے کی کوشش کی، لیکن ہندوستان نے واضح کر دیا کہ جموں و کشمیر ہندوستان کا اٹوٹ انگ ہے اور تمام تنازعات کو دو طرفہ طور پر حل ہونا چاہیے۔

پاکستان دہشت گردی کو پال رہا ہے

ہندوستان بار بار پاکستان پر سرحد پار دہشت گردی کو فروغ دینے کا الزام لگاتا رہا ہے۔ ہندوستان نے کہا کہ اس نے اپنی سرحدوں پر دہائیوں سے پاکستان کے حمایت یافتہ دہشت گردانہ حملے جھیلے ہیں۔ اس کے لیے 26/11 ممبئی حملہ (2008) اور حالیہ اپریل 2025 میں پہلگام حملے کی مثال دی گئی، جس میں 26 افراد ہلاک ہوئے۔

جولائی 2025: اقوام متحدہ کی 80ویں سالگرہ پر ہندوستان کا موقف

ہندوستان نے عالمی امن، کثیرالطرفہ تعاون اور دہشت گردی کے خلاف سخت مؤقف کے ساتھ اپنا نظریہ پیش کیا۔ اقوام متحدہ میں ہندوستان کے سفیر پروتھانی ہریش نے اپنی تقریر میں کہا کہ سرد جنگ کے بعد تنازعات کی نوعیت بدلی ہے اور غیر ریاستی دہشت گرد گروہوں کا کردار بڑھا ہے۔ پاکستان کو کرارا جواب دیتے ہوئے کہا گیا کہ "پاکستان شدت پسندی اور دہشت گردی میں ڈوبا ہوا ہے۔

ہندوستان کے سفیر نے مزید کہا کہ میں پاکستان کے نمائندے کی باتوں کا جواب دینا ضروری سمجھتا ہوں۔ ہندوستان ترقی، خوشحالی اور ترقی کا ماڈل ہے۔ ایک طرف ہندوستان ہے جو ایک پختہ جمہوریت اور ابھرتی ہوئی معیشت ہے، اور دوسری طرف پاکستان ہے جو شدت پسندی اور دہشت گردی میں ڈوبا ہوا ہے اور مسلسل بین الاقوامی مالیاتی فنڈ سے قرض لے رہا ہے۔

فروری 2025: ہندوستان کا اقوام متحدہ میں بیان

سفیر پروتھانی ہریش نے کہا کہ ہندوستان طویل عرصے سے پاکستان کی پشت پناہی والے دہشت گردی کا شکار رہا ہے۔ پاکستان کی سرزمین پر پلنے والے جیش محمد جیسے دہشت گرد گروپوں نے ہندوستان میں کئی دہشت گردانہ حملے کیے۔ انہوں نے پاکستان کو دہشت گردی کا عالمی مرکز قرار دیا اور کہا کہ وہاں اقوام متحدہ کی طرف سے ممنوعہ 20 سے زیادہ دہشت گرد تنظیمیں موجود ہیں۔ اس کے باوجود پاکستان خود کو دہشت گردی کے خلاف لڑنے والا ملک کہتا ہے، جو ایک بڑی ستم ظریفی ہے۔

جون 2025: بچوں اور مسلح تصادم پر بحث میں ہندوستان کا مؤقف

ہندوستان نے اقوام متحدہ کی سلامتی کونسل کی کھلی بحث کے دوران پاکستان کے ناپاک عزائم کو مسترد کر دیا۔ پاکستان پر بچوں کے حقوق کی خلاف ورزی اور سرحد پار دہشت گردی سے توجہ ہٹانے کا الزام بھی لگایا۔ ہندوستان نے پہلگام حملے اور آپریشن سندور کا ذکر کرتے ہوئے کہا کہ ان میں مارے گئے دہشت گردوں کو پاکستان نے ریاستی اعزاز کے ساتھ دفنایا تھا۔

مئی 2025: پاکستان کے دوہرے معیار پر ہندوستان کی تنقید

ہندوستان نے اقوام متحدہ کی سلامتی کونسل میں پاکستان کے رویے کو انتہائی منافقانہ قرار دیا۔ کہا کہ جو ملک دہشت گردوں اور عام شہریوں میں فرق نہیں کرتا، اسے شہریوں کی حفاظت پر بات کرنے کا کوئی حق نہیں۔ سفیر ہریش نے کہا کہ پاکستان نے دہشت گردی کو فروغ دینے کے لیے بارہا عام شہریوں کی آڑ لی ہے۔ آپریشن سندور میں مارے گئے دہشت گردوں کو پاکستانی فوجی افسروں نے خراج عقیدت پیش کیا، اور پاکستانی فوج نے جان بوجھ کر ہندوستانی سرحدی گاؤں  میں گولہ باری کر کے عام شہریوں کو نشانہ بنایا۔
پاکستان اکثر اقوام متحدہ میں کشمیر اور انسانی حقوق کے معاملے پر صفائیاں پیش کرتا ہے، لیکن جب جب اس نے ہندوستان پر الزام تراشی کی کوشش کی، تب تب ہندوستان نے اسے بے نقاب کیا۔ یہ ایک دیرینہ سفارتی کوشش ہے جس میں ہندوستان نے بار بار پاکستان کو عالمی برادری کے سامنے شرمندہ کیا ہے۔