جودھ پور :راجستھان ہائی کورٹ، جودھ پور نے جنریشن زی، جنریشن الفا اور جنریشن بیٹا سے متعلق مسائل کا ازخود نوٹس لیتے ہوئے جنک فوڈ، اسکرین کے ضرورت سے زیادہ استعمال، پیپر لیک، دیہی اسکولوں میں ناکافی بنیادی ڈھانچے اور مصنوعی ذہانت کے دور میں بنیادی تعلیمی صلاحیتوں کے ممکنہ زوال پر تشویش ظاہر کی ہے۔ 1997 سے 2012 کے درمیان پیدا ہونے والے افراد کو جنریشن زی، 2013 سے 2024 کے درمیان پیدا ہونے والوں کو جنریشن الفا کہا جاتا ہے، جبکہ 2025 سے 2039 کے درمیان پیدا ہونے والے بچے جنریشن بیٹا کہلائیں گے۔

جسٹس انوپ کمار دھند کی سنگل بنچ نے پیر کے روز اسکول کینٹینوں اور اسکول کے گیٹ سے 50 میٹر کے دائرے میں زیادہ چکنائی، زیادہ شکر اور زیادہ نمک (HFSS) والی غذائی اشیا کی فروخت پر پابندی عائد کر دی۔ ممنوعہ اشیا میں کاربونیٹیڈ مشروبات، چپس، ٹرانس فیٹ پر مشتمل بیکری مصنوعات اور دیگر جنک فوڈ شامل ہیں۔ عدالت نے ہر اسکول کو چار ہفتوں کے اندر ایک اسکول فوڈ سیفٹی اینڈ نیوٹریشن کمیٹی تشکیل دینے کی ہدایت دی، جس میں اساتذہ، والدین اور طلبہ کے نمائندے شامل ہوں گے۔ ان کمیٹیوں کی تفصیلات محکمہ تعلیم کی ویب سائٹ پر اپ لوڈ کی جائیں گی۔

آٹھ ہفتوں کے اندر اسکول کینٹینوں کے لیے لازمی ہوگا کہ وہ مینو بورڈ پر کھانے کی اشیا کی کیلوری، اجزا اور غذائی اہمیت کی معلومات درج کریں اور ٹریفک لائٹ لیبلنگ نظام نافذ کریں۔ عدالت نے صحت، تعلیم، عوامی تقسیم اور صارفین کے امور سے متعلق متعدد محکموں کے ساتھ ساتھ ریاست کے چیف سکریٹری کو بھی نوٹس جاری کرتے ہوئے اپنی ہدایات پر آٹھ ہفتوں کے اندر جواب طلب کیا ہے۔ ریاستی حکومت کو چھ ہفتوں کے اندر حلف نامہ داخل کرنے کی ہدایت دی گئی ہے، جس میں سرکاری، امداد یافتہ اور نجی اسکولوں میں محفوظ اور متوازن غذا سے متعلق 2020 کے ضوابط پر عمل درآمد کے لیے کیے گئے اقدامات کی تفصیلات ہوں۔

عدالت نے کہا کہ مڈ ڈے میل اور دیگر غذائی اسکیموں کو ایف ایس ایس اے آئی کی متوازن غذا سے متعلق رہنما ہدایات کے مطابق ہونا چاہیے۔ خوراک کی حفاظت کے اصولوں کی خلاف ورزیوں کی شکایات کے لیے ایک مخصوص پورٹل اور ہیلپ لائن قائم کرنے کی بھی ہدایت دی گئی ہے۔ بنچ نے بچوں میں موبائل اسکرین کے بڑھتے ہوئے استعمال اور ٹیکنالوجی پر حد سے زیادہ انحصار پر بھی تشویش ظاہر کی۔ عدالت نے تسلیم کیا کہ اے آئی اور ڈیجیٹل تعلیم طلبہ کو عالمی مسابقت کے لیے تیار کرنے کے لیے ضروری ہیں، لیکن خبردار کیا کہ ٹیکنالوجی بنیادی تعلیمی صلاحیتوں کی جگہ نہیں لے سکتی۔

عدالت نے ہاتھ سے لکھنے، کتابیں پڑھنے، نوٹس بنانے، آزادانہ سوچنے اور تحریری امتحانات کی اہمیت برقرار رکھنے پر زور دیتے ہوئے ڈیجیٹل اور روایتی تعلیم کے درمیان توازن قائم رکھنے کی ضرورت بتائی۔ بنچ نے بار بار ہونے والے پیپر لیک پر بھی تشویش ظاہر کرتے ہوئے کہا کہ اس سے طلبہ کی ذہنی صحت اور تعلیمی نظام الاوقات متاثر ہوتے ہیں اور امتحانی نظام پر عوام کا اعتماد کمزور پڑتا ہے۔ عدالت نے پیپر لیک روکنے کے لیے ایک فول پروف نظام وضع کرنے کی ضرورت پر زور دیا۔

عدالت نے حکام کو دیہی اور دور دراز علاقوں کے سرکاری اسکولوں میں خالی اساتذہ کی آسامیوں، اسمارٹ کلاس رومز، کمپیوٹروں، انٹرنیٹ کنیکٹیویٹی، صحت جانچ، بیت الخلا، پینے کے پانی اور کھیلوں کی سہولیات سے متعلق کمیوں کو دور کرنے کی ہدایت دی۔ ضلع کلکٹروں کو دیہی اسکولوں کا اچانک معائنہ کرکے آٹھ ہفتوں کے اندر رپورٹ پیش کرنے کا حکم دیا گیا ہے۔ چیف سکریٹری کی سربراہی میں ایک سہ ماہی نگرانی سیل بھی قائم کرنے کی ہدایت دی گئی ہے تاکہ عدالتی احکامات پر عمل درآمد کی نگرانی کی جا سکے۔

عدالت نے مرکز اور ریاستی حکومتوں سے جنریشن زی کو درپیش چیلنجوں، جن میں تعلیم اور روزگار کے درمیان فرق، گِگ ورکرز کے لیے سماجی تحفظ، سستے ہاسٹل اور رہائش، ڈیجیٹل ڈی ٹاکس پروگرام، ڈیٹا پرائیویسی اور سائبر سکیورٹی شامل ہیں، سے نمٹنے کے لیے منصوبہ تیار کرنے کو بھی کہا ہے۔ تینوں نئی نسلوں سے متعلق مسائل کا جائزہ لینے میں عدالت کی معاونت کے لیے وکلا کو عدالتی معاونین (امیکس کیوری) مقرر کیا گیا ہے۔