نئی دہلی: مغربی بنگال حکومت ریاست میں ماحولیاتی تحفظ اور شجرکاری کو فروغ دینے کے مقصد سے 2027 میں 20 کروڑ پودے لگائے گی۔ وزیر اعلیٰ شوبھندو ادھیکاری نے منگل کو یہ اعلان کیا۔ شوبھندو نے موہر کنج میں پودا لگا کر ایک ہی دن میں پوری ریاست میں 50 لاکھ درخت لگانے کی مہم کا آغاز کیا۔

انہوں نے کہا کہ اکتوبر سے سندربن میں تین کروڑ مینگروو کے درخت لگائے جائیں گے۔ وزیر اعلیٰ نے کہا، ’’ہم نے 2027 میں 20 کروڑ پودے لگانے کا منصوبہ بنایا ہے۔‘‘ انہوں نے بتایا کہ اس مہم کو ریاست کا محکمۂ جنگلات اور محکمۂ پنچایت مشترکہ طور پر نافذ کریں گے۔ انہوں نے کہا، ’’ہمیں اسی سال 10 کروڑ درخت لگانے ہیں اور اگلے دو سال تک ان درختوں کی دیکھ بھال بھی کرنی ہوگی۔‘

‘ شوبھندو نے کہا کہ صرف پودے لگا کر ان کے ساتھ تصویر کھنچوانے سے کام نہیں چلے گا، بلکہ کم از کم دو سال تک ان پودوں کی دیکھ بھال کرنا ضروری ہے، تاکہ وہ اچھی طرح نشوونما پا سکیں۔ انہوں نے بتایا کہ متعلقہ افسران نے انہیں یقین دلایا ہے کہ ان پودوں کی تین سال تک دیکھ بھال کی جائے گی۔

وزیر اعلیٰ نے کہا کہ مغربی بنگال میں شجرکاری اور جنگلات میں اضافے کے پروگراموں کے لیے رقم کی کوئی کمی نہیں ہونے دی جائے گی۔ انہوں نے کہا، ’’اگر اس ’سٹی آف جوی‘ (کولکاتا) کو بچانا ہے تو بڑی تعداد میں درخت لگانے ہوں گے۔‘‘