گوہاٹی: کانگریس کے صدر ملیکارجن کھڑگے نے منگل کو دعویٰ کیا کہ آسام اسمبلی انتخابات میں حزبِ اختلاف کا اتحاد 126 میں سے 72-73 نشستیں جیت کر حکومت بنائے گا۔ انہوں نے ایک پریس کانفرنس میں یہ بھی کہا کہ آسام کے وزیر اعلیٰ ہمنت وشو شرما بھارت کے “سب سے کرپٹ” رہنما ہیں اور ان کے خلاف لگائے گئے الزامات پر قومی سویم سیوک سنگھ (آر ایس ایس) کے سربراہ موہن بھاگوت کو اپنی رائے دینی چاہیے۔

کھڑگے نے دعویٰ کیا، کانگریس کی قیادت میں یہ اتحاد آسام میں اگلی حکومت بنانے جا رہا ہے۔ ہم 72-73 نشستیں جیتیں گے۔ کانگریس کے صدر نے وزیر اعلیٰ شرما کو کرپشن کے الزامات پر نشانہ بنایا۔ کھڑگے نے الزام لگایا، بھارت میں کوئی بھی وزیر اعلیٰ ان جیسا خود پسند نہیں ہے۔ ہمنت وشو شرما صرف اپنے خاندان کی ترقی کے لیے کام کر رہے ہیں۔ وہ چائے، اسکول، کوئلہ، انڈے، زمین، بیلٹ، ہر چیز میں سنڈیکیٹ چلا رہے ہیں۔

انہوں نے دعویٰ کیا کہ شرما کی کابینہ کا ہر رکن "کرپٹ" ہے اور ان سب کے پاس "ہزاروں کروڑ روپے کی جائیداد" ہے۔ کھڑگے نے کہا، "میں آسام کے وزیر اعلیٰ کے خلاف کرپشن کے الزامات پر موہن بھاگوت کی رائے جاننا چاہتا ہوں۔ میں وزیر اعظم اور وزیر داخلہ سے بھی درخواست کرتا ہوں کہ وہ اپنی رائے دیں۔

شرما کی بیوی کے تین غیر ملکی پاسپورٹ رکھنے اور بیرون ملک جائیداد رکھنے کے کانگریس کے ترجمان پون کھیڑا کے الزامات کے بارے میں پوچھے جانے پر کھڑگے نے کہا کہ تمام ایجنسیاں مرکزی حکومت کے ماتحت ہیں، جنہیں الزامات کی تحقیقات کرنی چاہیے۔

کانگریس کے صدر نے کہا، پولیس نے پہلے ہی کھیڑا کے خلاف ایف آئی آر درج کر دی ہے۔ انہیں معاملے کی تحقیقات کرنے دیں۔ جیسے جیسے معاملہ آگے بڑھے گا، ہم اس کا سامنا کریں گے۔ کھڑگے نے مزید دعویٰ کیا کہ وزیر اعظم نریندر مودی کو کانگریس رہنما راہل گاندھی یا گاندھی خاندان کے بارے میں بات کرنے کا کوئی حق نہیں"ہے، جن کے افراد نے ملک کو متحد کرنے کے لیے اپنی زندگی قربان کی۔ کانگریس پر اقلیتیوں کو خوش کرنے کے الزامات کے بارے میں انہوں نے کہا، "جن کے پاس کم عقل ہے وہ کانگریس کو مسلم پرست اور پاکستان نواز کہتے ہیں۔