پٹنہ: بہار کی راجدھانی پٹنہ کے گردنی باغ میں بدھ (26 مارچ 2025) کو آل انڈیا مسلم پرسنل لا بورڈ سمیت کئی مسلم تنظیموں نے وقف ترمیمی بل کے خلاف احتجاجی دھرنا دیا۔ اس احتجاج کے دوران بہار کے وزیر اعلیٰ نتیش کمار کی پارٹی جنتا دل یونائیٹڈ (جے ڈی یو) کی بھی ردِعمل سامنے آئی۔

جے ڈی یو کے ایم ایل سی خالد انور نے کہا کہ مسلمانوں میں اس بل کو لے کر خدشات پائے جا رہے ہیں۔ جب تک ان کے خدشات دور نہیں ہوں گے، یہ بل پارلیمنٹ میں پاس نہیں ہوگا۔ خالد انور کے مطابق، سی ایم نتیش کمار بھی یہی چاہتے ہیں کہ تمام اسٹیک ہولڈرز کے خدشات کو دور کیا جائے۔ جے ڈی یو ایم ایل سی خالد انور نے کہا کہ سی ایم نتیش کمار پہلے ہی کہہ چکے ہیں کہ اس بل پر اسٹیک ہولڈرز سے مشاورت ہونی چاہیے اور ان کی رائے کو شامل کیا جانا چاہیے۔

انہوں نے مزید کہا، ملک بھر کے تمام مسلمانوں کو میں یقین دلاتا ہوں کہ جب تک ان کے خدشات دور نہیں ہو جاتے، یہ بل قانون کی شکل اختیار نہیں کرے گا۔ اس وقت تک یہ پارلیمنٹ میں پاس نہیں ہوگا۔ وقف جائیدادوں کو لے کر مسلمانوں میں خوف و ہراس پیدا کیا جا رہا ہے، جسے دور کیا جانا ضروری ہے۔ پٹنہ میں جاری وقف ترمیمی بل کے خلاف احتجاج پر خالد انور نے آر جے ڈی کو نشانہ بنایا۔ انہوں نے کہا کہ یہ احتجاج آر جے ڈی کے ذریعہ منظم کیا گیا ہے۔آر جے ڈی نے سالوں تک وقف جائیدادوں کی لوٹ مار کی ہے۔

اب وہی پارٹی مسلمانوں کے نام پر سیاست کر رہی ہے۔ یہاں یہ ذکر کرنا ضروری ہے کہ خالد انور، جے ڈی یو کے ایک بڑے اقلیتی چہرے مانے جاتے ہیں۔ اتر پردیش کے وزیر اعلیٰ یوگی آدتیہ ناتھ کے ایک متنازع بیان پر بھی خالد انور نے سخت ردعمل دیا۔ انہوں نے کہا، سی ایم یوگی کبھی کبھی اپنی حد سے نیچے اتر آتے ہیں۔

کسی مہذب لیڈر کو ایسی زبان نہیں استعمال کرنی چاہیے۔ جب کوئی شخص آئینی حدود سے باہر جا کر بات کرنے لگے، تو اس کا کیا جواب دیا جائے؟ واضح رہے کہ یوگی آدتیہ ناتھ نے سنبھل میں ایک بیان دیتے ہوئے کہا تھا: جتنے بھی ہوں گے، سب کو کھودیں گے۔ کیا متھرا شری کرشن کی جنم بھومی نہیں ہے؟ ہم تو صرف عدالت کے حکم کی تعمیل کر رہے ہیں، ورنہ اب تک وہاں بہت کچھ ہو چکا ہوتا۔