نئی دہلی:نائب صدر کے انتخاب کے حوالے سے تیاریاں مکمل ہو گئی ہیں۔ منگل 9 ستمبر کو ہونے والے اس انتخاب میں این ڈی اے کے امیدوار سی پی رادھا کرشنن کا مقابلہ انڈیا الائنس کے بی سدرشن ریڈی سے ہوگا۔ لوک سبھا اور راجیہ سبھا کے اراکین اپنے ووٹ ڈال سکیں گے۔ ووٹنگ صبح 10 بجے سے شروع ہو کر شام 5 بجے تک جاری رہے گی اور اسی روز نتائج کا اعلان بھی کر دیا جائے گا۔

راجیہ سبھا کے سیکریٹری جنرل پی سی مودی کے مطابق یہ ووٹنگ پارلیمنٹ ہاؤس میں انتخابی افسر کی نگرانی میں ہوگی۔ اس انتخاب میں لوک سبھا کے 543 اراکین (ایک نشست خالی)، راجیہ سبھا کے 233 منتخب اراکین (پانچ نشستیں خالی) اور 12 نامزد اراکین حصہ لیں گے۔ یہ انتخاب ملک کے 17ویں نائب صدر کے لیے ہوگا۔

نائب صدر کے عہدے کی تاریخ اور دلچسپ پہلو

اب تک ملک کے 14 افراد نائب صدر کے طور پر خدمات انجام دے چکے ہیں، جن میں سے چھ کا تعلق جنوبی ہند سے رہا ہے۔ لیکن آج تک کوئی خاتون نائب صدر منتخب نہیں ہو سکی۔ نجمہ ہپت اللہ 2007 میں اس عہدے کی امیدوار ضرور رہیں لیکن کامیاب نہ ہو سکیں۔

پہلے نائب صدر سروپلی رادھا کرشنن تھے جو 1952 اور 1957 میں بلامقابلہ منتخب ہوئے۔ وہ بعد میں صدر بھی بنے۔ ذاکر حسین 1962 میں نائب صدر بنے اور پھر صدر کے عہدے تک پہنچے۔ ان کے انتقال کے بعد کچھ عرصہ تک یہ عہدہ خالی بھی رہا۔ بی ڈی جٹی نے تین مختلف وزرائے اعظم کے دور میں نائب صدر کی حیثیت سے کام کیا۔ محمد ہدایت اللہ وہ واحد شخصیت رہے جو چیف جسٹس، نائب صدر اور صدر تینوں عہدوں پر فائز ہوئے۔

دلچسپ انتخابی حقائق

1992 میں کے آر نارائنن نائب صدر منتخب ہوئے اور ان کے مخالف امیدوار کو محض ایک ووٹ ملا۔ بی جے پی سے بھیرو سنگھ شیخاوت پہلے نائب صدر بنے اور بعد میں وینکیا نائیڈو اور جگدیپ دھنکھر نے بھی یہ منصب سنبھالا۔ دھنکھر نے اگست 2022 میں 14ویں نائب صدر کی حیثیت سے حلف لیا تھا لیکن جولائی 2025 میں اچانک استعفیٰ دے دیا۔

2007 میں پہلی بار تین امیدوار میدان میں اترے، جن میں حامد انصاری (یو پی اے)، نجمہ ہپت اللہ (این ڈی اے) اور راشد مسعود (ایس پی) شامل تھے۔ اس انتخاب میں حامد انصاری کامیاب ہوئے اور مسلسل دو بار اس عہدے پر فائز رہے۔

شنکر دیال شرما کا شمار ان چند رہنماؤں میں ہوتا ہے جنہوں نے صدر، نائب صدر، وزیر اعلیٰ اور کابینہ وزیر جیسے بڑے عہدوں پر خدمات انجام دیں۔ مجموعی طور پر 7 نائب صدر ایسے رہے جو بعد میں صدر کے عہدے پر بھی فائز ہوئے۔

موجودہ مقابلہ

اس مرتبہ انتخابی معرکہ این ڈی اے کے امیدوار سی پی رادھا کرشنن (موجودہ گورنر مہاراشٹر) اور انڈیا الائنس کے امیدوار بی سدرشن ریڈی (سابق جج سپریم کورٹ) کے درمیان ہے۔ آئین کے آرٹیکل 66 کے تحت، جیتنے کے لیے کسی امیدوار کو 50 فیصد سے زائد ووٹ حاصل کرنا ضروری ہے۔

انتخاب خفیہ بیلٹ کے ذریعے ہوگا، اور سیاسی جماعتیں اپنے اراکین پر وہپ نافذ نہیں کر سکتیں۔ اراکین پارلیمان اپنی پسند کے مطابق امیدوار کو ووٹ دینے کے لیے آزاد ہیں۔ 

نائب صدر کے انتخاب کا ٹائم لائن اور طریقہ کار

نائب صدر کا انتخاب 9 ستمبر کو ہوگا۔ اس میں لوک سبھا اور راجیہ سبھا کے مجموعی طور پر 782 ارکان پارلیمنٹ ووٹ ڈالیں گے۔ کامیابی کے لیے امیدوار کو ڈالے گئے درست ووٹوں میں سے 50 فیصد سے زیادہ حاصل کرنا ضروری ہے۔ 2022 میں جگدیپ دھنکھڑ نے 528 ووٹ حاصل کرکے مارگریٹ الوا کو شکست دی تھی، جبکہ 2017 میں وینکیا نائیڈو نے 516 ووٹ حاصل کرکے گوپال کرشنا گاندھی کو ہرایا تھا۔

موجودہ سیاسی صورتحال اور نمبر گیم

فی الحال لوک سبھا میں این ڈی اے کو واضح اکثریت حاصل ہے اور کئی علاقائی پارٹیاں بھی اس کی حمایت کر رہی ہیں۔ یہی وجہ ہے کہ سی پی رادھا کرشنن کی جیت تقریباً طے سمجھی جا رہی ہے۔ البتہ اس بار اپوزیشن کا انڈیا بلاک پہلے کے مقابلے میں زیادہ متحد اور مضبوط دکھائی دیتا ہے۔اپوزیشن میں کانگریس، ترنمول کانگریس، عام آدمی پارٹی، ڈی ایم کے، سماج وادی پارٹی، راشٹریہ جنتا دل، بائیں بازو کی جماعتیں اور دیگر شامل ہیں، جو سب مل کر سودرشن ریڈی کی حمایت میں سرگرم انتخابی مہم چلا رہے ہیں۔

نائب صدر کا انتخاب: جنوبی ہند پر توجہ

اس سال کے انتخاب کی ایک انوکھی بات یہ ہے کہ دونوں امیدوار جنوبی ہند سے ہیں۔ سی پی رادھا کرشنن کا تعلق تمل ناڈو سے ہے جبکہ سودرشن ریڈی آندھرا پردیش سے ہیں۔ اس وجہ سے جنوبی ہند کی سیاست اچانک قومی گفتگو کا مرکزی موضوع بن گئی ہے۔

اپوزیشن کا کہنا ہے کہ ملک میں علاقائی توازن اور آئینی اقدار کی نمائندگی کرنے والا چہرہ درکار تھا تاکہ این ڈی اے کی بڑھتی ہوئی بالادستی کو چیلنج کیا جا سکے۔ دوسری طرف بی جے پی نے جنوبی ہند سے امیدوار کھڑا کرکے یہ عندیہ دیا ہے کہ وہ ہندی پٹی سے باہر بھی اپنی جڑیں مضبوط کرنے کی خواہش رکھتی ہے۔

جماعتوں کی پیشگی تیاری

انتخابات سے پہلے بی جے پی نے اپنے ارکان پارلیمنٹ کے لیے دو روزہ ورکشاپ منعقد کی، جس میں ووٹنگ کے طریقہ کار اور خفیہ بیلٹ کے تکنیکی پہلوؤں پر تفصیل سے ہدایات دی گئیں۔ این ڈی اے قیادت نے واضح کیا کہ معمولی سی لاپرواہی بھی اپوزیشن کو فائدہ پہنچا سکتی ہے، اس لیے احتیاط لازمی ہے۔ اپوزیشن نے بھی اپنے ارکان کی یکجہتی برقرار رکھنے کے لیے بار بار میٹنگز کی ہیں۔

نائب صدر کے منصب کی آئینی اور سیاسی اہمیت

ہندوستان کا نائب صدر نہ صرف راجیہ سبھا کا چیئرمین ہوتا ہے بلکہ وہ ملک کے صدر کے بعد دوسرا سب سے بڑا آئینی منصب ہے۔ سیاسی اعتبار سے بھی اس عہدے کی اپنی نمایاں اہمیت ہے۔

اعداد و شمار کیا بتاتے ہیں؟

دستیاب اعداد و شمار کے مطابق این ڈی اے کے پاس لوک سبھا میں 293، راجیہ سبھا میں 106 اور راجیہ سبھا کے 12 نامزد ارکان کی حمایت ہے، یوں کل تعداد 414 بنتی ہے۔ یہ تعداد واضح طور پر این ڈی اے کی جیت کی طرف اشارہ کرتی ہے۔ تاہم اپوزیشن جماعتوں کی حالیہ یکجہتی کے باعث اس بار جیت کا مارجن 2022 اور 2017 کے مقابلے میں کم رہنے کا امکان ہے۔