نئی دہلی: ہندوستان کے نائب صدر کے عہدے کے لیے 9 ستمبر 2025 کو ہونے والے انتخاب کی صورتحال اب مکمل طور پر واضح ہو چکی ہے۔ نامزدگیوں اور اُن کی جانچ کے بعد صرف دو امیدوار باضابطہ طور پر انتخابی میدان میں باقی رہ گئے ہیں این ڈی اے کے امیدوار سی پی رادھا کرشنن اور متحدہ اپوزیشن کے امیدوار بی. سدرشن ریڈی۔

دلچسپ بات یہ ہے کہ دونوں امیدوار جنوبی ہند سے تعلق رکھتے ہیں، اس لیے اس مقابلے کو جنوب بمقابلہ جنوب کی شکل دی جا رہی ہے۔ انتخابی دفتر کے مطابق دونوں امیدواروں کے چاروں سیٹوں پر مشتمل کاغذات نامزدگی درست پائے گئے ہیں۔ سی پی رادھا کرشنن بھارتیہ جنتا پارٹی کے سینئر رہنما ہیں اور اس وقت مہاراشٹر کے گورنر کے عہدے پر فائز ہیں، جبکہ بی. سدرشن ریڈی، جن کا تعلق ریاست تلنگانہ سے ہے، سپریم کورٹ کے جج رہ چکے ہیں۔

اس بار نائب صدر کے انتخاب کے لیے مجموعی طور پر 46 افراد نے 68 کاغذاتِ نامزدگی داخل کیے تھے۔ ان میں سے 19 افراد کے 28 کاغذات تکنیکی بنیادوں پر ابتدائی طور پر مسترد کر دیے گئے۔ باقی 27 امیدواروں کے 40 کاغذات کی 22 اگست کو جانچ کی گئی، جس کے بعد کئی مزید کاغذات قانون کے تحت نامنظور کر دیے گئے۔

آخرکار صرف دو امیدواروں  سی پی رادھا کرشنن (کاغذات 26 تا 29) اور بی. سدرشن ریڈی (کاغذات 41 تا 44) — کے کاغذاتِ نامزدگی کو مکمل طور پر درست قرار دے کر قبول کر لیا گیا۔ یہ جانچ اور مستردگی صدر و نائب صدر انتخابی قانون 1952 کے سیکشن 5(2)(4)، 5(1)(ب) اور 5(1)(ج) کے تحت کی گئی۔ ان دفعات کے تحت وہ کاغذات مسترد کر دیے گئے جو مکمل یا قانونی تقاضوں کے مطابق نہ تھے۔

انتخابی کمیشن کے جاری کردہ شیڈول کے مطابق، امیدوار 25 اگست 2025 تک اپنے کاغذات واپس لے سکتے ہیں۔ اس کے بعد حتمی امیدواروں کی فہرست جاری کی جائے گی اور 9 ستمبر کو باقاعدہ ووٹنگ ہوگی۔ یہ انتخاب ملکی سیاست کے لیے ایک اہم مرحلہ ہے، جس میں پارلیمنٹ کے اراکین نائب صدر کا انتخاب کریں گے، جو راجیہ سبھا (ایوان بالا) کے چیئرمین کے طور پر بھی خدمات انجام دیتے ہیں۔