نئی دہلی: پیپلز ڈیموکریٹک پارٹی (پی ڈی پی) کی صدر محبوبہ مفتی نے منگل کو کہا کہ کشمیری پنڈتوں کے بغیر کشمیر نامکمل ہے اور وادی کے لوگ بے چینی سے ان کی واپسی کا انتظار کر رہے ہیں۔ سابق وزیر اعلیٰ نے یہ تجویز بھی دی کہ کشمیری پنڈتوں کے لیے اسمبلی کی دو نشستیں محفوظ (ریزرو) کرنا بہتر ہوگا۔

محبوبہ مفتی نے گاندھی نگر میں واقع پی ڈی پی کے صدر دفتر میں صحافیوں سے بات کرتے ہوئے کہا، "کشمیری پنڈتوں کو اپنا فیصلہ خود کرنا ہوگا۔ ہم ان کی واپسی کا بے صبری سے انتظار کر رہے ہیں، کیونکہ ان کے بغیر وادی ادھوری ہے۔" وہ کشمیری پنڈتوں سے متعلق ایک سوال کا جواب دے رہی تھیں، جن کی وادی سے ہجرت کے 36 سال 19 جنوری کو مکمل ہو گئے اور جو گزشتہ دو دنوں سے اپنی واپسی اور بازآبادکاری کے لیے احتجاج کر رہے ہیں۔

پی ڈی پی سربراہ نے کہا کہ انہوں نے حال ہی میں لیفٹیننٹ گورنر منوج سنہا سے ملاقات کی اور انہیں بتایا کہ اسمبلی میں برادری کے دو اراکین کو نامزد کرنے کے بجائے، ان کے لیے نشستیں مخصوص کی جانی چاہئیں۔ انہوں نے کہا، "انہیں آنے دیجئے، انتخابات لڑنے دیجئے۔ وہ ووٹ مانگیں گے اور مسلمان انہیں ووٹ دیں گے۔ اسی طرح برادریاں ایک دوسرے کے قریب آئیں گی۔

انہوں نے مزید کہا، "وہ ہمارے بھائی ہیں، اور ہم چاہتے ہیں کہ وہ عزت کے ساتھ واپس آئیں اور ہمارے ساتھ مل کر رہیں تاکہ کشمیر مکمل ہو سکے۔" محبوبہ مفتی نے یہ بھی کہا کہ ان کی پارٹی کا واحد ایجنڈا بات چیت اور ترقی کے ذریعے جموں و کشمیر میں امن و خوشحالی کی بحالی اور اس کے تمام خطوں کی یکجہتی ہے۔

سابق وزیر اعلیٰ نے پیر پنجال اور چناب وادی کو ڈویژن کا درجہ دینے کی اپنی تجویز کو ڈکسن منصوبے سے جوڑنے پر نیشنل کانفرنس (این سی) اور بھارتیہ جنتا پارٹی (بی جے پی) پر تنقید بھی کی۔