پتھوراگڑھ: اتراکھنڈ کے ضلع پتھوراگڑھ کے دھارچولا علاقے میں واقع ویاش گھاٹی کے بلند ہمالیائی علاقے میں بھگوان شو کے مقدس دھام آدی کیلاش کی یاترا پر اس سال اب تک ریکارڈ 31,187 عقیدت مند پہنچ چکے ہیں۔ یہ اطلاع ہفتہ کو ایک افسر نے دی۔

یاترا کے نوڈل افسر اور دھارچولا کے سب ڈویژنل مجسٹریٹ جتیندر ورما نے بتایا کہ گزشتہ سال 29,352 عقیدت مندوں نے آدی کیلاش یاترا کی تھی۔ انہوں نے کہا، "اکتوبر 2023 میں وزیر اعظم نریندر مودی کے دورے کے بعد یاترا کو بہت فروغ ملا، اور اسی سال 10,023 تیرتھ یاتری آدی کیلاش کے درشن کے لیے پہنچے۔"

انہوں نے یہ بھی بتایا کہ وزیر اعظم کے دورے سے قبل آدی کیلاش آنے والے تیرتھ یاتریوں کی تعداد کبھی بھی ڈھائی ہزار سے تجاوز نہیں کر پائی تھی۔ مثال کے طور پر، 2022 میں صرف 1,757 عقیدت مند آدی کیلاش پہنچے تھے۔ سب ڈویژنل مجسٹریٹ ورما نے کہا، "مانسون کے دوران دھارچولا بیس کیمپ سے جیولنگ کانگ تک راستے میں لینڈ سلائیڈنگ کی وجہ سے یاترا میں رکاوٹ ضرور آئی، لیکن اس کے باوجود عقیدت مندوں کا جوش کم نہیں ہوا۔"

انہوں نے بتایا کہ ابھی مزید عقیدت مندوں کے آنے کا امکان ہے، کیونکہ یاترا کا دوسرا مرحلہ 31 اکتوبر تک جاری رہے گا۔ اس کے بعد راستے پر برفباری کی وجہ سے یاترا رک جاتی ہے۔ آدی کیلاش یاترا کا آغاز 1981 میں کیلاش مانسروور یاترا کے ساتھ ہوا تھا، کیونکہ یہاں عقیدت مندوں کو کم خرچ اور کم مشقت میں بھگوان شو کے درشن ہو جاتے ہیں۔