لکھنؤ: اتر پردیش پولیس نے پیر کے روز ریاستی کانگریس صدر اجے رائے کو لکھنؤ میں حراست میں لے لیا۔ انہیں سہارنپور کلکٹریٹ احاطے کے اندر تاریخی مسجد کی مسماری کے خلاف احتجاج کی قیادت کرنے کے بعد حراست میں لیا گیا۔صحافیوں سے گفتگو کرتے ہوئے اجے رائے نے بھارتیہ جنتا پارٹی کی زیر قیادت ریاستی حکومت کو شدید تنقید کا نشانہ بنایا اور اس کے اقدامات کو جابرانہ اور ناانصافی پر مبنی قرار دیا۔

انہوں نے کہا کہ حکومت جابرانہ رویہ اختیار کر رہی ہے۔ ناانصافی اور ظلم کے خلاف آواز اٹھانے پر ہمیں زبردستی گرفتار کیا جا رہا ہے۔ ہم اس ظلم کے خلاف ضرور لڑیں گے۔ آج مسلمانوں کو نشانہ بنانے والی اس حکومت کو ہم اقتدار سے بے دخل کریں گے اور کانگریس کارکن مسلم برادری کے خلاف ہونے والے کسی بھی مزید ظلم کے سامنے مضبوطی سے کھڑے رہیں گے۔

سہارنپور کلکٹریٹ مسجد کو ہفتے کی صبح عدالت کے اس حکم کے بعد منہدم کردیا گیا جس میں مسجد کو ہٹانے کے فیصلے کو برقرار رکھا گیا تھا۔اس سے قبل اتوار کے روز اجے رائے نے کہا تھا کہ صورتحال کا جائزہ لینے کے لیے کانگریس کی حقائق جانچنے والی ٹیم 7 ستمبر کو سہارنپور پہنچے گی۔انہوں نے کہا کہ یہ انتہائی افسوسناک ہے۔ ہماری حقائق جانچنے والی ٹیم 7 ستمبر کو سہارنپور پہنچے گی اور صورتحال کو سمجھنے کے لیے حکام سے ملاقات کرے گی۔ بتایا جاتا ہے کہ یہ مسجد تقریباً 100 سال پرانی تھی اور کلکٹریٹ کی عمارت تعمیر ہونے سے پہلے ہی یہاں موجود تھی۔

لکھنؤ عیدگاہ کے امام مولانا خالد رشید فرنگی محلی نے بھی سہارنپور کلکٹریٹ کے احاطے میں موجود غیر قانونی قرار دی گئی مسجد کی مسماری کی مذمت کی۔جمعہ کے روز ضلع جج کی عدالت نے 4 ستمبر کو مسجد کمیٹی کی اپیل مسترد کرتے ہوئے سٹی مجسٹریٹ کے سابقہ حکم کو برقرار رکھا تھا۔

سٹی مجسٹریٹ کی عدالت نے 17 جولائی کو اس ڈھانچے کو منہدم کرنے کا حکم دیا تھا۔ عدالت نے مبینہ طور پر سرکاری زمین پر تجاوزات اور اس کے غلط استعمال کے معاملے میں تقریباً 6.41 کروڑ روپے معاوضہ بھی عائد کیا تھا۔سہارنپور کے ڈی آئی جی ابھیشیک سنگھ نے کہا کہ مسماری عدالت کے حکم کے بعد قانونی طریقہ کار کے مطابق کی جا رہی ہے۔انہوں نے بتایا کہ افواہوں کی روک تھام کے لیے حساس مقامات پر اضافی پی اے سی اور آر اے ایف اہلکار تعینات کیے گئے ہیں۔ سوشل میڈیا پر بھی نظر رکھی جا رہی ہے۔