لکھنؤ/ آواز دی وائس

اتر پردیش کے وزیرِ اعلیٰ یوگی آدتیہ ناتھ نے منگل کے روز شدید سردی کے دوران ریاست کے شہریوں سے اپیل کی کہ وہ ضرورت مندوں کے تئیں حساس رویہ اختیار کریں اور ان کی مدد کریں۔وزیرِ اعلیٰ نے ریاست کے باشندوں کے نام ایک پیغام سوشل میڈیا پلیٹ فارم ‘ایکس’ پر شیئر کیا۔

اپنے پیغام میں انہوں نے کہا کہ شمالی ہندوستان میں سرد لہر سے بچاؤ کے لیے حکومت پوری حساسیت اور مستعدی کے ساتھ کام کر رہی ہے۔ افسران کو انسانی اور نہایت حساس نقطۂ نظر اپنانے کی ہدایت دی گئی ہے۔

وزیرِ اعلیٰ نے شہری فرائض کی یاد دہانی کراتے ہوئے کہا کہ ایک شہری ہونے کے ناطے آپ بھی اس نیک کوشش میں شریک بن سکتے ہیں۔ اپنے آس پاس نظر ڈالیں۔ گھروں میں کام کرنے والے معاونین، صفائی کارکنان، چوکیدار یا دیگر افراد سے کم از کم ایک بار ضرور پوچھیں کہ کیا ان کے پاس سرد لہر سے بچاؤ کے لیے مناسب انتظامات موجود ہیں یا نہیں۔

یوگی آدتیہ ناتھ نے اپنی پوسٹ میں کہا کہ انسانی قدروں اور احساسِ ذمہ داری کی پہچان ایسے ہی وقت میں ہوتی ہے۔ خدمتِ خلق ہماری روایت ہے۔ انہوں نے کہا کہ انتودیہ سے سروودیہ کے مضبوط عزم کے ساتھ ہم ‘ترقی یافتہ اتر پردیش’ کے ہدف کی جانب تیزی سے آگے بڑھ رہے ہیں۔

یوگی آدتیہ ناتھ نے بتایا کہ شہری بلدیاتی اداروں اور تحصیلوں کے ذریعے ضرورت مندوں میں اونی کپڑے اور کمبل تقسیم کیے جا رہے ہیں۔ انہوں نے کہا کہ عوامی مقامات پر الاؤ کا انتظام کیا گیا ہے اور کپکپاتی سردی میں کوئی بھی محروم شخص بے سہارا نہیں رہے گا۔ یوگی نے مزید کہا کہ گاؤشالاؤں میں خصوصی کمبل اور الاؤ کا بندوبست کیا جا رہا ہے۔ اس کے علاوہ دھند کے دوران محفوظ سفر کو یقینی بنانے کے لیے راستوں پر اضافی سکیورٹی اہلکار تعینات کیے گئے ہیں اور بیداری مہم بھی جاری ہے۔

انہوں نے کہا کہ شمالی ہندوستان میں سرد لہر سے بچاؤ کے لیے حکومت پوری حساسیت اور مستعدی سے کام کر رہی ہے، پوری ریاست میں رین بسیروں کو مکمل صلاحیت کے ساتھ چلایا جا رہا ہے۔ دوسرے مقامات سے آنے والے امتحانی امیدواروں اور مریضوں کے اہلِ خانہ کو بھی یہاں پناہ فراہم کی جا رہی ہے، کیونکہ حکومت کے لیے ہر انسان کی جان قیمتی ہے۔