علی گڑھ (یوپی): علی گڑھ پولیس نے آل انڈیا مجلس اتحاد المسلمین (اے آئی ایم آئی ایم) کے ضلعی صدر یامین خان عباسی کے خلاف کانوڑ یاترا سے متعلق مبینہ قابلِ اعتراض بیان دینے پر مقدمہ درج کر لیا ہے۔ پولیس کے مطابق یہ معاملہ اس وقت سامنے آیا جب عباسی نے عیدگاہ کے قریب سڑک پر عیدالاضحیٰ کی نماز کی اجازت مانگتے ہوئے کانوڑ یاترا کے حوالے سے ایک تبصرہ کیا۔

سِول لائنز تھانے میں درج ایف آئی آر شہری گورو وارشنے کی شکایت پر کی گئی ہے، جس میں بھارتیہ نیا سنہیتا (BNS) کی دفعات 192 (فساد بھڑکانے کی کوشش) اور 353(3) (مذہبی جذبات کو مشتعل کرنے والے بیانات) شامل ہیں۔ شکایت میں الزام لگایا گیا ہے کہ عباسی نے کہا تھا کہ مسلمانوں کو عیدگاہ کے باہر نماز کی اجازت نہیں دی جاتی، جبکہ کانوڑ یاترا کے دوران سڑکیں بند کر کے کانوڑیوں کے لیے خصوصی انتظامات کیے جاتے ہیں۔

مزید یہ بھی الزام ہے کہ انہوں نے کانوڑیوں کے خلاف نامناسب زبان استعمال کی اور ان پر ہنگامہ آرائی اور نشہ کرنے جیسے الزامات عائد کیے۔ پولیس نے بتایا ہے کہ معاملے کی جانچ جاری ہے۔ اس سے قبل عباسی اور دیگر عہدیداران نے ضلع مجسٹریٹ کو ایک میمورنڈم دے کر عیدگاہ میں ممکنہ بھیڑ کے پیش نظر متصل سڑک پر نماز کی اجازت طلب کی تھی۔