نئی دہلی: بھارت نے جمعرات کے روز پاکستان سے اپیل کی کہ وہ سزا پوری کر چکے 167 بھارتی ماہی گیروں اور شہری قیدیوں کی رہائی اور ان کی وطن واپسی کے عمل میں تیزی لائے۔ وزارتِ خارجہ نے یہاں بتایا کہ بھارت نے پاکستان سے یہ بھی کہا ہے کہ وہ اپنی تحویل میں موجود 35 ایسے شہری قیدیوں اور ماہی گیروں کو فوری طور پر قونصلر (سفارتی) رسائی فراہم کرے جن کے بھارتی ہونے کا یقین ہے۔

بھارت نے یہ درخواست دونوں ممالک کے درمیان شہری قیدیوں اور ماہی گیروں کی فہرستوں کے تبادلے کے تناظر میں کی ہے، جو 2008 کے ایک معاہدے کے تحت ہر سال یکم جنوری اور یکم جولائی کو کیا جاتا ہے۔ وزارتِ خارجہ کے مطابق، بھارت نے اپنی تحویل میں موجود 391 شہری قیدیوں اور 33 ماہی گیروں کے نام اور تفصیلات پاکستان کے ساتھ شیئر کی ہیں، جو پاکستانی ہیں یا جن کے پاکستانی ہونے کا یقین ہے۔

اسی طرح، پاکستان نے اپنی تحویل میں موجود 58 شہری قیدیوں اور 199 ماہی گیروں کی تفصیلات بھارت کے ساتھ شیئر کی ہیں، جو بھارتی ہیں یا جن کے بھارتی ہونے کا یقین ہے۔ وزارتِ خارجہ کے ایک بیان میں کہا گیا، بھارت کی حکومت نے پاکستان سے اپیل کی ہے کہ وہ اپنی تحویل میں موجود شہری قیدیوں، ماہی گیروں، ان کی کشتیوں اور لاپتہ بھارتی دفاعی اہلکاروں کو جلد از جلد رہا کر کے وطن واپس بھیجے۔

بیان میں مزید کہا گیا، پاکستان سے یہ بھی درخواست کی گئی ہے کہ وہ سزا پوری کر چکے 167 بھارتی ماہی گیروں اور شہری قیدیوں کی رہائی اور وطن واپسی میں تیزی لائے۔ بھارت نے پاکستان سے خاص طور پر یہ بھی کہا ہے کہ تمام بھارتی اور بھارتی سمجھے جانے والے شہری قیدیوں اور ماہی گیروں کی رہائی اور وطن واپسی تک ان کی سلامتی، تحفظ اور فلاح و بہبود کو یقینی بنایا جائے۔ وزارتِ خارجہ نے کہا، بھارت حکومت کی مسلسل کوششوں کے نتیجے میں 2014 سے اب تک پاکستان سے 2,661 بھارتی ماہی گیر اور 71 بھارتی شہری قیدی وطن واپس لائے جا چکے ہیں۔