نئی دہلی :ڈی جی سی اے (ڈائریکٹوریٹ جنرل آف سول ایوی ایشن) نے جمعہ کو اطلاع دی کہ دہلی سے سری نگر جانے والی انڈیگو کی پرواز کے پائلٹوں نے بدھ کے روز خراب موسم سے بچنے کے لیے پاکستان کی فضائی حدود میں داخلے کی اجازت طلب کی تھی، لیکن پاکستان نے اس درخواست کو مسترد کر دیا۔

ڈی جی سی اے نے واقعے کی تفصیلی رپورٹ میں کہا ہے کہ طیارے میں سوار کسی بھی مسافر کو کوئی چوٹ نہیں آئی، تاہم طیارے کے اگلے حصے یعنی "نوز ریڈوم" کو نقصان پہنچا ہے۔ خراب موسم کا شکار ہونے والے اس طیارے کے واقعے کی جانچ کی جا رہی ہے۔

خراب موسم میں انڈیگو فلائٹ کے عملے نے کیا کیا؟
بدھ کے روز انڈیگو کی ای321 نیو طیارہ، پرواز نمبر 6E 2142، پٹھان کوٹ کے قریب اولے اور شدید خراب موسم کا شکار ہوا۔ ڈی جی سی اے کے مطابق، "پائلٹوں کے بیان کے مطابق، انہوں نے راستے میں خراب موسم کی وجہ سے بھارتی فضائیہ کے شمالی کنٹرول (IAF) سے بین الاقوامی سرحد کی طرف بائیں جانب جانے کی اجازت طلب کی، لیکن اجازت نہیں ملی۔"

ڈی جی سی اے نے مزید بتایا، "بعد ازاں عملے نے خراب موسم سے بچنے کے لیے لاہور سے پاکستانی فضائی حدود میں داخلے کی اجازت مانگی، مگر یہ درخواست بھی مسترد کر دی گئی۔"

ریگولیٹر کے مطابق، عملے نے ابتدائی طور پر واپس لوٹنے کی کوشش کی، لیکن جب وہ طوفانی بادلوں کے قریب پہنچے، تو انہوں نے خراب موسم کے باوجود آگے بڑھنے کا فیصلہ کیا۔ بیان میں کہا گیا، "اس کے بعد انہیں اولے اور شدید خراب موسم کا سامنا کرنا پڑا۔ عملے نے فیصلہ کیا کہ خراب موسم سے بچنے کے لیے وہ مختصر ترین راستے سے سری نگر کی سمت میں آگے بڑھیں گے۔"