لکھنؤ: وزیر اعظم نریندر مودی کی عوامی زندگی کے 25 سال مکمل ہونے کے موقع پر اتر پردیش میں 17 ستمبر سے 17 اکتوبر تک ایک ماہ پر مشتمل ’سیوا سنکلپ ابھیان‘ چلایا جائے گا۔ حکام نے جمعرات کو یہ اطلاع دی۔ اتر پردیش بی جے پی کے صدر اور مرکزی وزیر مملکت برائے خزانہ پنکج چودھری اور ریاستی جنرل سکریٹری (تنظیم) دھرم پال کی موجودگی میں وزیر اعلیٰ یوگی آدتیہ ناتھ نے مہم کی تیاریوں کا جائزہ لیا۔

یوگی آدتیہ ناتھ نے کہا کہ اس مہم میں زیادہ سے زیادہ عوامی شرکت یقینی بنائی جانی چاہیے اور مرکزی و ریاستی حکومتوں کی کامیابیوں کو فائدہ اٹھانے والے لوگوں کی حقیقی کہانیوں کے ذریعے عوام کے سامنے پیش کیا جانا چاہیے۔ وزیر اعلیٰ نے کہا، "یہ مہم وزیر اعظم مودی کی 25 سالہ عوامی خدمت اور ’وکست بھارت 2047‘ کے عزم کو ہر شخص کا عزم بنائے گی۔" ایک بیان کے مطابق وزیر اعلیٰ نے اضلاع کے انچارج وزرا کو اپنے اپنے اضلاع اور اسمبلی حلقوں کا دورہ کرکے مہم کی تیاریوں کا جائزہ لینے کی ہدایت دی ہے۔ ’سیوا سنکلپ ابھیان‘ کے لیے حکومت، وزیر اعلیٰ دفتر اور ضلعی سطح پر تین سطحی تال میل کا نظام قائم کیا گیا ہے۔

اس کے ساتھ ہی مرکزی حکومت کی جانب سے گزشتہ 12 برس اور ریاستی حکومت کی جانب سے گزشتہ 10 برس میں کیے گئے ترقیاتی کاموں کی تفصیلات بھی تیار کی گئی ہیں۔ مہم کے دوران فلاحی اسکیموں، ترقی، ثقافتی سرگرمیوں اور عوامی شرکت پر مرکوز متعدد پروگرام منعقد کیے جائیں گے۔ اس موقع پر 17 ستمبر کو ’سیوا دیوس: آشیرواد کا دیا‘ منایا جائے گا۔ اس دوران شام 7 بجے مستحقین کے گھروں اور اہم ترقیاتی منصوبوں پر چراغ روشن کیے جائیں گے۔

اس کے علاوہ 17 ستمبر سے 7 اکتوبر تک ’میرے سپنوں کا بھارت: چتر سیوا‘ پروگرام کے تحت تعلیمی اداروں میں مصوری، تقریر اور مباحثے کے مقابلے منعقد کیے جائیں گے۔ ’نمو سیوا: ان کہی کہانیاں‘ کے تحت ثقافتی ٹیمیں نکڑ ناٹک کے ذریعے وزیر اعظم مودی کی 25 سالہ عوامی زندگی، فلاحی اسکیموں اور ترقیاتی کاموں کو پیش کریں گی۔

حکومت ’سیوا کی کہانی‘ پروگرام بھی شروع کرے گی، جس کے تحت 25 لاکھ مستحقین کی زندگی میں آنے والی تبدیلی کی حقیقی کہانیوں پر مبنی 60 سیکنڈ کی ریلز تیار کی جائیں گی۔ ان میں رہائش اور صحت کی اسکیموں سے فائدہ اٹھانے والوں کے ساتھ ساتھ اہم بنیادی ڈھانچے کے منصوبوں سے وابستہ لوگوں کی کہانیاں بھی شامل ہوں گی۔ ’انفلوئنسرز کنیکٹ‘ کے تحت 150 ڈیجیٹل انفلوئنسرز، پوڈکاسٹ چلانے والے افراد اور ولاگرز اہم ترقیاتی منصوبوں کا دورہ کریں گے اور اتر پردیش میں ہونے والی تبدیلی کو اجاگر کریں گے۔

سیوا سنکلپ ابھیان میں خون کا عطیہ، شجرکاری، صفائی مہم، صحت کی جانچ، تعلیمی مدد، پانی کے تحفظ اور سائبر سکیورٹی سے متعلق بیداری جیسی رضاکارانہ سرگرمیاں بھی شامل ہوں گی۔ کم از کم 25 منٹ رضاکارانہ خدمت انجام دے کر اس کی تصویر یا ویڈیو ’مائی بھارت پورٹل‘ پر اپ لوڈ کرنے والے شہریوں کو ڈیجیٹل سرٹیفکیٹ دیے جائیں گے۔ ہر ترقیاتی بلاک میں سات روزہ ’سیوا سیتو‘ کیمپ لگائے جائیں گے، جہاں صحت کی خدمات فراہم کرنے کے ساتھ مرکزی اور ریاستی حکومت کی مختلف اسکیموں سے متعلق معلومات، درخواست دینے اور اہلیت کی تصدیق کی سہولت بھی دستیاب ہوگی۔

اس کے علاوہ وارانسی سے خصوصی ’وڈ نگر سے وارانسی یاترا‘ شروع کی جائے گی، جس میں 250 موٹر سائیکلوں پر سوار 500 شرکا گنگا جل لے کر وڈ نگر جائیں گے۔ مہم کا اختتام 17 اکتوبر کو ’سوشاسن سیوا سمواد‘ کے ساتھ ہوگا۔ اس میں گاؤں کے پردھانوں سے لے کر ارکان پارلیمنٹ تک عوامی نمائندے شرکت کریں گے اور ’وکست بھارت 2047‘ کے عزم کو دہرائیں گے۔