امروہہ/ آواز دی وائس
اتر پردیش کے امروہہ ضلع میں جہیز کو لے کر ہوئے تنازعے میں بیوی کو مبینہ طور پر زندہ جلانے کے الزام میں ریاستی پولیس کے ایک ہیڈ کانسٹیبل کو بدھ کے روز گرفتار کر لیا گیا۔ ایک افسر نے یہ اطلاع دی۔
افسر نے بتایا کہ ملزم دیویندر سنگھ رامپور میں تعینات تھا۔
پولیس کے مطابق، متاثرہ خاندان نے دیویندر کے خلاف جہیز کے لیے بیوی پارول سنگھ کو ہراساں کرنے کا الزام لگاتے ہوئے ڈڈولی تھانے میں ایف آئی آر درج کرائی۔ پولیس نے بتایا کہ اکونڈا گاؤں میں نرس پارول کو منگل کے روز پیش آئے اس واقعے میں شدید چوٹیں آئی ہیں۔
ایڈیشنل پولیس سپرنٹنڈنٹ اکھلیش بھدوریا نے بتایا کہ خاتون کو ابتدائی طور پر سنگین حالت میں ایک مقامی اسپتال لے جایا گیا، جس کے بعد بہتر علاج کے لیے اسے دہلی منتقل کر دیا گیا۔
پولیس نے اس واقعے کے پیچھے کی وجہ واضح نہیں کی ہے۔
بھدوریا نے ہیڈ کانسٹیبل کی گرفتاری کی تصدیق کرتے ہوئے بتایا کہ دیویندر سنگھ کو گرفتار کر عدالت میں پیش کیا گیا۔ انہوں نے بتایا کہ خاتون کی حالت نازک بنی ہوئی ہے۔
