ادے پور/ آواز دی وائس
راجستھان کے ادے پور سے انسانیت کو شرمسار کرنے والا ایک واقعہ سامنے آیا ہے۔ رپورٹ کے مطابق یہاں اتوار کو کھیت میں گئی ایک 8 سالہ بچی کے ساتھ ایک شخص نے ریپ کیا۔ اس واقعے سے دیہاتیوں میں شدید غم و غصہ پھیل گیا اور انہوں نے زبردست احتجاج کیا۔
پولیس نے ملزم کو گرفتار کیا
رپورٹ کے مطابق یہ واقعہ اتوار شام تقریباً 7:30 بجے پیش آیا، جب بچی اکیلی کھیتوں میں گئی تھی۔ پولیس افسر حکم سنگھ کے مطابق، ایک شخص اس کے قریب آیا، اس کا منہ بند کیا اور اسے پاس کی جھاڑیوں میں لے گیا، جہاں اس نے مبینہ طور پر دھمکی دے کر اس کے ساتھ ریپ کیا۔ درندگی کے بعد ملزم فرار ہوگیا، لیکن بعد میں پولیس نے اسے پکڑ لیا۔
بچی نے گھر پہنچ کر اپنے اہلِ خانہ کو یہ واقعہ بتایا، جنہوں نے فوراً اسے مہارانا بھوپال اسپتال پہنچایا۔ ڈاکٹروں نے بتایا کہ اس کی حالت خطرے سے باہر ہے۔ پیر کی صبح تک بڑی تعداد میں دیہاتی ڈبک پولیس اسٹیشن کے باہر جمع ہوگئے اور فوری کارروائی کا مطالبہ کرنے لگے۔ مظاہرین نے ایس ڈی ایم، پولیس اور نجی گاڑیوں کے ساتھ ساتھ بسوں میں بھی توڑ پھوڑ کی، پھر قومی شاہراہ کے سروس روڈ کو جام کر دیا۔
اس ناکہ بندی کے باعث علاقے میں طویل ٹریفک جام لگ گیا۔ کشیدہ صورتحال کو قابو میں کرنے کے لیے تین تھانوں کی پولیس تعینات کی گئی اور ہجوم کو منتشر کرنے کے لیے ہلکا طاقت کا استعمال کیا گیا۔
افسران اب بھی گاؤں والوں کو پرسکون کرنے کی کوشش کر رہے ہیں۔ فرانزک ٹیم اور ڈاگ اسکواڈ نے جائے وقوعہ سے شواہد اکٹھے کر لیے ہیں اور آس پاس کے سی سی ٹی وی فوٹیج کی جانچ کی جا رہی ہے۔ پولیس نے تصدیق کی ہے کہ ملزم حراست میں ہے اور تفتیش جاری ہے۔
.webp "ادے پور: 8 سالہ بچی کی عصمت دری کے بعد زبردست ہنگامہ")
