نئی دہلی: دہلی پولیس نے ہریانہ کی الفلّاح یونیورسٹی کے خلاف جعل سازی اور دھوکہ دہی کے الزامات میں دو الگ الگ ایف آئی آر درج کی ہیں۔ ایک افسر نے ہفتے کے روز بتایا کہ یہ کارروائی اس وقت کی گئی جب یونیورسٹی گرانٹ کمیشن (یو جی سی) اور نیشنل اسیسمنٹ اینڈ ایکریڈیٹیشن کونسل (این اے اے سی) نے یونیورسٹی کے بارے میں اپنی تشویش ظاہر کی۔

افسر کے مطابق یونیورسٹی کی جانب سے منظوری (ریکگنیشن) کے حوالے سے مبینہ جھوٹے دعوؤں کے بعد کرائم برانچ نے دھوکہ دہی اور جعل سازی کے الزامات میں دو مقدمات درج کیے ہیں۔ انہوں نے بتایا کہ یو جی سی اور این اے اے سی نے یونیورسٹی کے کام کاج کے جائزے کے دوران ’’بڑی سطح پر بے ضابطگیاں‘‘ پائی تھیں، جس کے بعد قانون نافذ کرنے والی ایجنسیوں کو مداخلت کرنا پڑی۔

اس سے پہلے دہلی پولیس کی اسپیشل سیل نے لال قلعہ کے قریب ہونے والے دھماکے کے پیچھے بڑی سازش کی تحقیقات کے لیے فوجداری سازش سے متعلق دفعات کے تحت ایک الگ ایف آئی آر درج کی تھی۔ غیر قانونی سرگرمیاں (روک تھام) ایکٹ (یو اے پی اے) کے تحت درج ابتدائی مقدمہ پہلے ہی قومی تحقیقاتی ایجنسی (این آئی اے) کو منتقل کیا جا چکا ہے۔

الفلّاح یونیورسٹی ہریانہ کے ضلع فریدآباد کے دھوج میں واقع ہے۔ پولیس کی ایک ٹیم نے دہلی کے اوکھلا میں واقع یونیورسٹی کے ہیڈکوارٹر کا بھی دورہ کیا اور مشتبہ افراد کے بارے میں معلومات اکٹھی کیں۔ پولیس نے بتایا کہ معاملے کی مزید تفتیش جاری ہے۔