نیو دہلی :6 جون جموں و کشمیر کے لیے ایک تاریخی دن ہونے والا ہے۔ وزیر اعظم نریندر مودی آج مرکز کے زیر انتظام علاقے کو کئی اہم بنیادی ڈھانچے کے منصوبے تحفے میں دینے جا رہے ہیں۔ جس کی کل لاگت تقریباً 46 ہزار کروڑ روپے بتائی جاتی ہے۔ ان منصوبوں میں دنیا کا سب سے اونچا ریلوے پل چناب پل، بھارت کا پہلا کیبل اسٹے ریل پل انجی پل اور ادھم پور-سری نگر-بارہمولہ ریل لنک پروجیکٹ شامل ہیں۔ نیز، وندے بھارت ایکسپریس شری ماتا ویشنو دیوی کٹرا سے سری نگر کے لیے شروع کی جائے گی۔

 دہلی سے سرینگر تک کا ریل سفر، کشمیری عوام کے لیے خوشحالی کا نیا دروازہ بن جائے گا، نئی دہلی سے براہِ راست کشمیر تک ٹرین چلنے میں شاید سیکیورٹی وجوہات کی بنا پر کچھ تاخیر ہو، لیکن 6 جون کو وزیر اعظم نریندر مودی کی جانب سے اُدھم پور–سرینگر–بارہمولہ ریل لنک (USBRL) کے افتتاح کے اگلے ہی دن، کوئی بھی ویشنو دیوی، کٹڑہ سے وندے بھارت ایکسپریس میں سوار ہو کر صرف چار گھنٹوں میں سرینگر پہنچ سکتا ہے۔

یہ ریلوے منصوبہ، جو جموں کے سرسبز وادیوں، گھنے جنگلات، دریائے چناب کے کنارے اور سرنگوں کے بیچ سے گزرتا ہے، نہ صرف تکنیکی لحاظ سے ایک عظیم کارنامہ ہے بلکہ کشمیر وادی کے لیے زندگی کی نئی لَہر بننے جا رہا ہے۔ USBRL کی تکمیل سے جموں کے دور دراز اضلاع اُدھم پور، رام بن اور ریاسی کو بھی قومی دھارے میں شامل کیا جا رہا ہے۔کشمیر اور بھارت کے درمیان گہرا رشتہ

یہ ریلوے لائن کشمیر کو سال بھر ہندوستان کے دیگر حصوں سے جوڑے رکھے گی، جو کہ مسلمان اکثریتی کشمیر اور باقی بھارت کے درمیان عوامی اور تجارتی رشتوں کو مضبوط کرنے کے لیے بے حد ضروری ہے۔ خاص طور پر سردیوں کے موسم میں جب سرینگر-جموں ہائی وے برفباری یا لینڈ سلائیڈنگ کے باعث بند ہو جاتا ہے، تو یہ ریلوے لائن کشمیری عوام کے لیے ایک پائیدار سہارا بنے گی۔

تجارت، روزگار اور خوشحالی کا دروازہ

ریل سروس سے نہ صرف سفر آسان ہوگا بلکہ تجارت اور معیشت کو بھی نئی رفتار ملے گی۔ آزمائشی سفر کے دوران جب کشمیر سے چیری کے ڈبے پونے جیسے دور دراز شہروں تک سستے داموں پہنچے تو پریم پورہ (سرینگر) کے فروٹ ڈیلروں کی خوشی دیدنی تھی۔ ان کے پھل اب صرف دہلی کی آزادپور منڈی تک محدود نہیں رہیں گے۔

اس ریل منصوبے کی بدولت وہ علاقے جو ویشنو دیوی کے پہاڑوں کے اُس پار واقع ہیں – خصوصاً اُدھم پور، ریاسی اور رام بن – جو اب تک سیاحوں، سرمایہ کاروں اور کاروباری حلقوں کی پہنچ سے دور تھے، اب اُن کے لیے بھی ترقی اور روزگار کے دروازے کھلیں گے۔

لتھیئم کی دریافت: معیشت میں نئی جان

ریلوے لائن کے سب سے اونچے مقام بکل (ریاسی) کے قریب سالال میں حالیہ دنوں میں اعلیٰ معیار کے لتھیئم کی دریافت ہوئی ہے۔ اس قیمتی معدنیات کی کان کنی جلد شروع ہونے والی ہے،جو کہ بھارت کی الیکٹرانک، بیٹری، اور توانائی کی صنعت کے لیے انقلاب ثابت ہو سکتی ہے۔

وندے بھارت ایکسپریس: نیا سفر، نیا یقین

6 جون کو وزیراعظم مودی کے افتتاح کے بعد وندے بھارت ایکسپریس 7 جون سے باقاعدہ طور پر چلنا شروع ہو گئی۔
یہ سروس چھ دنوں تک (بدھ اور منگل کے علاوہ) دستیاب ہے اور سرینگر، بانہال اور کٹڑہ کے درمیان چلتی ہے

اوقاتِ کار

سرینگر سے روانگی: صبح 8:00 بجے
بانہال پہنچنا: 9:02 بجے
کٹڑہ آمد: 10:58 بجے

کٹڑہ سے واپسی: دوپہر 12:55 بجے
بانہال: 1:53 بجے
سرینگر واپسی3:00 بجے

عوامی جذبات: خوابوں کی تعبیر

مقامی لوگ اس منصوبے کو صرف ٹرین سروس نہیں بلکہ اپنی زندگی کی سب سے بڑی خوشی قرار دے رہے ہیں-عبدالعزیز چنڈیل نے کہا کہ یہ ہمارے لیے بہت آرام دہ سہولت ہوگی۔ ہم حکومت کے بے حد مشکور ہیں کیسر سنگھ نے ماضی کو یاد کرتے ہوئے کہا کہ پہلے یہاں عسکریت پسندی کے باعث حالات بہت خراب تھے، کسی نے سوچا بھی نہیں تھا کہ ریل آئے گی۔ لیکن اب حالات بہتر ہیں اور ہمیں یقین نہیں آتا کہ خواب پورا ہوا!چوہدری غلام حسین نے مزید ترقی کا مطالبہ کرتے ہوئے کہا:"یہ منصوبہ گلمرگ، پہلگام اور دیگر سیاحتی مقامات تک بھی پھیلایا جائے تاکہ روزگار کے مواقع میں اضافہ ہو۔کلدیپ کمار شرما نے کہا کہ ہمیں امید نہیں تھی کہ یہاں کبھی ریل چلے گی، لیکن مودی جی نے یہ ممکن کر دکھایا۔ اب ہم پورے ملک سے جُڑ گئے ہیں!"

سیکیورٹی انتظامات اور سیاسی اہمیت

وزیر اعظم کی آمد سے پہلے اُدھم پور ریلوے اسٹیشن پر سیکیورٹی کے سخت انتظامات کیے گئے۔ اس ریل لنک کی تکمیل نہ صرف علاقائی رابطے کو بہتر بناتی ہے بلکہ جموں و کشمیر کو قومی ریلوے نیٹ ورک سے جوڑ کر ملکی اتحاد و سالمیت کو مزید مضبوط بناتی ہے

USBRL صرف ایک ریل پراجیکٹ نہیں بلکہ کشمیر کے لیے ایک نئی شروعات ہے۔ یہ نہ صرف فاصلے گھٹاتا ہے بلکہ دلوں کو جوڑتا ہے، روزگار لاتا ہے، سیاحت کو فروغ دیتا ہے اور سب سے بڑھ کر کشمیری عوام کو احساس دلاتا ہے کہ وہ ہندوستان کے اصل دھارے کا حصہ ہیں۔یہ واقعی ایک خواب تھا جو اب حقیقت میں بدل چکا ہے۔