نئی دہلی: سکریٹری تجارت راجیش اگروال نے پیر کے روز بتایا کہ عبوری تجارتی معاہدے کے قانونی مسودے کو حتمی شکل دینے کے لیے بھارتی حکام کا ایک وفد اگلے ہفتے امریکہ کا دورہ کرے گا۔ توقع ہے کہ اس معاہدے پر مارچ میں دستخط کیے جائیں گے۔

انہوں نے کہا کہ یہ دورہ ممکنہ طور پر 23 فروری سے شروع ہوگا۔ بھارت اور امریکہ نے رواں ماہ کے آغاز میں ایک مشترکہ بیان جاری کرتے ہوئے اعلان کیا تھا کہ عبوری تجارتی معاہدے کا فریم ورک تیار کر لیا گیا ہے۔ راجیش اگروال نے صحافیوں سے گفتگو کرتے ہوئے کہا، “مشترکہ بیان میں معاہدے کی بنیادی خاکہ بندی کر دی گئی ہے۔ اب اس خاکے کو ایک باقاعدہ قانونی معاہدے کی صورت دینا ہوگا، جس پر دونوں فریق دستخط کریں گے۔

انہوں نے مزید بتایا کہ دونوں ممالک اس معاہدے کو قانونی شکل دینے کے عمل میں مصروف ہیں اور آن لائن مذاکرات جاری ہیں۔ اگروال کے مطابق، بھارت کے چیف مذاکرات کار درپن جین کی قیادت میں ایک وفد آئندہ ہفتے امریکہ روانہ ہوگا تاکہ تجارتی معاہدے کو قانونی طور پر حتمی شکل دی جا سکے۔