نئی دہلی: سپریم کورٹ نے الہ آباد ہائی کورٹ کے متنازعہ حکم کو منسوخ کرتے ہوئے کہا ہے کہ نجی اعضا کو چھونا اور پاجامے کا ناڑا کھینچنا ‘‘ریپ کی کوشش’’ کے زمرے میں آتا ہے۔ ہائی کورٹ نے اپنے متنازعہ حکم میں کہا تھا کہ نجی اعضا کو چھونا اور پاجامے کا ناڑا کھینچنا صرف ‘‘ریپ کرنے کی تیاری’’ ہے۔

بھارت کے چیف جسٹس سوریا کانت اور جج جوئے مالیا باگچی اور جج این وی انجاریا کی بنچ نے کہا کہ متنازعہ حکم کو ‘‘فوجداری قانون کے قائم شدہ اصولوں کے واضح طور پر غلط استعمال’’ کے سبب منسوخ کیا جانا چاہیے۔ سپریم کورٹ نے خود نوٹس لیتے ہوئے دائر درخواست پر 10 فروری کو یہ حکم جاری کیا۔

عدالت نے درخواست میں ہائی کورٹ کے اس حکم کا حوالہ لیا تھا جس میں کہا گیا تھا کہ صرف ‘‘نجی اعضا کو چھونا اور پاجامے کا نڑا کھینچنا ریپ کے جرم کے برابر نہیں’’ ہے۔ ہائی کورٹ کے فیصلے کو سپریم کورٹ نے منسوخ کر دیا اور کیس کے دو ملزمان کے خلاف بچوں کے تحفظ کے لیے جنسی جرائم کے قانون (POCSO) کے تحت درج ریپ کی کوشش کے اصل الزامات بحال کر دیے۔

بنچ نے کہا، ‘‘ہم ہائی کورٹ کے اس نتیجے سے متفق نہیں کہ اس کیس میں الزامات صرف تیاری سے متعلق تھے اور یہ ریپ کرنے کی کوشش نہیں تھی۔’’ عدالت نے کہا، ‘‘ملزمان کی طرف سے کی گئی کوشش ہمیں واضح اور لازمی طور پر اس نتیجے پر پہنچاتی ہے کہ شکایت کنندہ اور فوجداری عمل کے لحاظ سے ریپ کی کوشش سے متعلق دفعات کا اطلاق کرنے کا پہلا موقع موجود ہے۔

متنازعہ فیصلہ فوجداری قانون کے قائم شدہ اصولوں کے واضح طور پر غلط استعمال کی وجہ سے منسوخ کیا جانا چاہیے۔’’ سپریم کورٹ نے کہا کہ ان الزامات کو سطحی نظر سے دیکھنے پر بھی ‘‘کسی شک’’ کی گنجائش نہیں رہتی کہ جو مقدمہ بنتا نظر آ رہا ہے، وہ یہ ہے کہ ملزمان نے بھارتی فوجداری قانون (IPC) کی دفعہ 376 (ریپ) کے تحت جرم کرنے کا ارادہ رکھتے ہوئے یہ حرکات کیں۔

بنچ نے کہا، ‘‘17 مارچ 2025 کے متنازعہ فیصلے کو منسوخ کیا جاتا ہے اور 23 جون 2023 کا اصل سمَن آرڈر بحال کیا جاتا ہے جو کاسگنج کے خصوصی جج (POCSO) نے جاری کیا تھا۔’’ عدالت نے مزید کہا، یہ کہنے کی ضرورت نہیں کہ اس فیصلے میں جو تبصرے کیے گئے ہیں، وہ صرف شکایت کنندہ کے پیش کردہ مقدمے کے ابتدائی جائزے کے تناظر میں ہیں اور ملزمان کی مجرمیت کے بارے میں کسی رائے کے طور پر نہیں دیکھے جائیں۔

الہ آباد ہائی کورٹ نے 17 مارچ 2025 کے حکم میں کہا تھا کہ کسی لڑکی کے نجی اعضا کو چھونا اور اس کے پاجامے کا ناڑا کھینچنا ریپ کا معاملہ نہیں ہے، لیکن یہ کسی خاتون کو بے لباس کرنے کے ارادے یا مجرمانہ طاقت کے استعمال کے دائرے میں آتا ہے۔

یہ حکم ملزمان کی جانب سے دائر ایک نظرثانی درخواست کی سماعت کے دوران جج رام منوہر نارائن مشرا نے جاری کیا تھا۔ ملزمان نے کاسگنج کے خصوصی جج کے حکم کو چیلنج کرتے ہوئے یہ نظرثانی درخواست دائر کی تھی۔ کيس کے حقائق کے مطابق، خصوصی جج (POCSO) کی عدالت میں دائر درخواست میں الزام لگایا گیا تھا کہ 10 نومبر 2021 کو شام تقریباً پانچ بجے شکایت کنندہ خاتون اپنی 14 سالہ بیٹی کے ساتھ اپنی نند کے گھر سے واپس آ رہی تھی کہ اسی دوران اس کے گاؤں کے رہائشی پون، آکاش اور اشوک نے راستے میں اسے روکا اور پوچھا کہ وہ کہاں سے آ رہی ہے۔

درخواست کے مطابق، جب خاتون نے بتایا کہ وہ اپنی نند کے گھر سے واپس آ رہی ہے، تو انہوں نے اس کی بیٹی کو موٹر سائیکل پر گھر چھوڑنے کی بات کی جس کی خاتون نے اجازت دے دی۔ درخواست میں الزام ہے کہ ملزمان نے راستے میں ہی موٹر سائیکل روکی اور لڑکی کے نجی اعضا کو چھوا۔ الزام کے مطابق آکاش نے لڑکی کو کھینچ کر ایک پل کے نیچے لے جانے کی کوشش کی اور لڑکی کے پاجامے کا ناڑا کھینچا۔ درخواست کے مطابق، لڑکی کی چیخ و پکار سن کر دو افراد وہاں پہنچے، جس کے بعد ملزمان موقع سے فرار ہو گئے۔