آواز دی وائس : نئی دہلی

آج ہندوستان کی آزادی کے 75 سال مکمل ہونے کے موقع پر ملک زبردست جشن کے لیے اسٹیج سج چکے ہیں۔ ملک کی راجدھانی اور دیگر حصوں میں جشن آزادی کی زبردست تیاریاں کی گئی ہیں۔ کشمیر سے کنیا کماری تک ترنگوں کی بہار ہوگی ۔

اس مرتبہ جشن آزادی کچھ خاص ہے ،جسے حکومت نے 'آزادی کا امرت مہوتسو'کا نام دیا ہے۔ جس کے تحت ملک نے مارچ سے ہی آزادی کے 75 سال مکمل ہونےپر مختلف تقریبات اور سرگرمیوں کا آغاز کردیا تھا۔ملک کے وزیر اعظم نریندرمودی تاریخی لال قلعہ سے ملک کو خطاب کریں گے ۔

کورونا کے سبب زبردست احتیاطی انتظامات   

لال قلعہ کی تاریخی یادگار 15 اگست کو قوم کے یوم آزادی کی تقریبات کی میزبانی کے لیے تیار ہے۔ کوویڈ 19 کے خلاف اضافی احتیاطی اور حفاظتی اقدامات سمیت تمام حفاظتی انتظامات کیے جا رہے ہیں تاکہ بغیر کسی رکاوٹ کے پروگرام کو یقینی بنایا جا سکے۔

لال قلعہ میں موجود تمام عملے کے لیے دو روزہ ویکسینیشن کیمپ کا اہتمام کیا گیا تھا جو کہ کورونا وائرس سے بچاؤ کے لیے ایک قدم تھا جس کی پہلی لہر پچھلے سال اور دوسری لہر اس سال کے شروع میں ایک ہنگامہ برپا کرتی رہی۔

وزیر اعظم ہر سال یوم آزادی کے موقع پر پرچم لہراتے ہیں اور لال قلعے کی فصیل سے ملک سے خطاب کرتے ہیں۔ وزیر اعظم کے قریب سیکیورٹی پر مامور سیکیورٹی اہلکار اور دیگر عملہ 15 اگست سے دو دن پہلے کوویڈ 19 کے لیے ٹیسٹ کیا گیا تھا۔

 پچھلے سال کے انتظامات کی طرح اس بار بھی محدود کرسیاں رکھی گئی ہیں۔ وزیر اعظم کے گرد بیٹھے تمام رہنماؤں کی کرسیاں لگائی گئی ہیں ، دو گز کا فاصلہ برقرار رکھتے ہوئے۔

 یوم آزادی پر این سی سی کے طلباء کو بلایا جائے گا ، حالانکہ ان کی تعداد بھی محدود ہوگی۔

 معلومات کے مطابق ٹوکیو اولمپکس میں تمغے جیتنے والے کھلاڑیوں کو اس بار بھی وزیر اعظم کے قریب جگہ ملے گی۔ ان کی آمد و رفت کے لیے علیحدہ راہداری بنائی گئی ہے۔

سیکیورٹی کا جال

دہلی پولیس نے حفاظتی وجوہات کی بنا پر لال قلعے کے مرکزی دروازے کے باہر کنٹینر لگائے ہیں۔

 سکیورٹی ایجنسیاں پہلے ہی 15 اگست کو الرٹ جاری کرچکی ہیں۔ دہلی پولیس نے کسانوں کی تحریک اور خالصتان دہشت گردوں کی دھمکیوں کے پیش نظر یہ قدم اٹھایا ہے۔

 یوم آزادی کے پیش نظر دہلی پولیس اور مرکزی سیکورٹی ایجنسیوں نے سخت انتظامات کیے ہیں۔

 اس کے علاوہ اینٹی ڈرون ریڈار سسٹم بھی استعمال کیا جائے گا ، تاکہ کسی بھی قسم کا کوئی ڈرون لال قلعے کے گرد اڑ نہ سکے۔ اس نظام کی حد 5 کلومیٹر تک ہے۔

 دہلی پولیس نے لال قلعے کے گرد دہشت گردوں کے پوسٹر بھی چسپاں کیے ہیں۔ پوسٹرز میں چھ دہشت گردوں کا نام اور پتہ بتایا گیا ہے۔

 اولمپکس کا دستہ ہوگا مہمان

 یہ ایک خاص جشن آزادی ہوگا کیونکہ اس میں ٹوکیو اولمپکس میں حصہ لینے والے قومی دستہ کو بھی شامل کیا گیا ہے۔جو کہ اس یادگار اور تاریخی موقع پر مہمان خصوصی ہوگا۔

 یاد رہے کہ ہندوستان نے اس بار اولمپکس گیمز میں شاندار کار کردگی کا مظاہرہ کیا تھا۔ جس کے سبب وزیر اعظم مودی نے دستے کو جشن آزادی کا حصہ بنانے کا اعلان کیا تھا۔

 امرت مہوتسو

 امرت مہوتسو کے پانچ ستونوں پر خصوصی زور دیا گیا ہے۔ فریڈم اسٹرگل(جدوجہد آزادی)، انڈیا ایٹ 75(بھارت، آزادی کے 75 برس بعد)، اچیومنٹس ایٹ 75(حصول یابیاں، آزادی کے 75 برس بعد)، ایکشنز ایٹ 75 (عمل ، آزادی کے 75 برس بعد)اور ریزالوز ایٹ 75(عزائم، آزادی کے 75 برس بعد)۔

یہ پانچ ستون جدوجہد آزادی کے ساتھ ساتھ ایک آزاد ہندوستان کے خوابوں اور فرائض کو بھی سامنے رکھ کر آگے بڑھنے کی تحریک دیں گے۔

 مارچ میں گجرات کے سابرمتی آشرم میں منعقد 'آزادی کا امرت مہوتسو' کا آغاز ہوا تھا جب سابرمتی آشرم سے وزیر اعظم مودی نے پد یاترا کو ہری جھنڈی دکھا کر روانہ کیا تھا۔

 آزادی کا امرت مہوتسو' کو عوامی حصہ داری کے طور پر منایا جائے گا۔15 اگست 2022 سے 75 ہفتہ قبل سے اس پروگرام کی سرگرمیاں شروع ہو چکی ہیں۔

 صدر جمہوریہ کا پیغام

 ملک کے صدر جمہوریہ رام ناتھ کووند نے 75 ویں یوم آزادی کے موقع پر قوم کے نام اپنے خطاب میں کہا ہے کہ قوم کے معماروں نے عوام کے ضمیر پر اپنے اعتماد کا اظہار کیا اور 'ہم ہندوستان کے لوگ' اپنے ملک کو ایک طاقتور جمہوریت بنانے میں کامیاب رہے ہیں۔

پچہتر سال پہلے جب ہندوستان نے آزادی حاصل کی تھی، تب بہت سے لوگوں کو خدشہ تھا کہ ہندوستان میں جمہوریت کامیاب نہیں ہوگی۔ ایسے لوگ شاید اس حقیقت سے بے خبر تھے کہ قدیم زمانے میں جمہوریت کی جڑیں ہندوستان کی اس سرزمین میں پنپ چکی تھیں۔

اور جدید دور میں بھی ہندوستان بلا امتیاز تمام بالغ افراد رائے دہی حق کا دینے میں متعدد مغربی ممالک سے آگے رہا ہے"۔

 انہوں نے کہا کہ "ہمارا ملک، بہت سے دوسرے ممالک کی طرح، بیرونی حکمرانی کے دوران بہت زیادہ ناانصافیوں اور مظالم کا شکار ہوا۔

 لیکن ہماری خصوصیت یہ تھی کہ بابائے قوم مہاتما گاندھی کی قیادت میں ہندوستان کی تحریک آزادی سچ اور عدم تشدد کے اصولوں پر مبنی تھی۔

انہوں نے اور دیگر تمام قومی ہیروز نے نہ صرف ہندوستان کو نوآبادیاتی حکمرانی سے آزاد کرنے کا راستہ دکھایا بلکہ قوم کی تعمیر نو کا روڈ میپ بھی پیش کیا۔ انہوں نے ہندوستانی اقدار اور انسانی وقار کی بحالی کے لیے بھی بہت کوششیں کیں۔