نئی دہلی۔:وزیر اعظم نریندر مودی ہفتہ کے روز دہلی کے لال قلعے میں یوم آزادی کی 80ویں تقریبات کی قیادت کریں گے۔ اس سال کی تقریب وندے ماترم کے 150 سال مکمل ہونے اور ترقی یافتہ ہندوستان 2047 کے سفر میں یوا شکتی یعنی نوجوانوں کے کردار کو نمایاں کرے گی۔

پہلی بار لال قلعے میں یوم آزادی کی تقریبات کے دوران وندے ماترم پیش کیا جائے گا۔

ایک سرکاری بیان کے مطابق وزیر اعظم مودی کا لال قلعے میں وزیر دفاع راج ناتھ سنگھ۔ وزیر مملکت برائے دفاع سنجے سیٹھ اور دفاعی سکریٹری راجیش کمار سنگھ استقبال کریں گے۔ اس کے بعد انہیں فوج۔ بحریہ۔ فضائیہ اور دہلی پولیس کے اہلکاروں پر مشتمل گارڈ آف آنر پیش کیا جائے گا۔

وزیر اعظم اس کے بعد لال قلعے کی فصیل پر جائیں گے جہاں وہ قومی پرچم لہرائیں گے۔ کیپٹن سونیا سنگھ چوہان قومی پرچم لہرانے میں ان کی معاونت کریں گی۔

قومی پرچم لہرائے جانے کے موقع پر 1721 فیلڈ بیٹری کی جانب سے 21 توپوں کی سلامی دی جائے گی۔ اس موقع پر ہندوستان میں تیار کی گئی 105 ملی میٹر لائٹ فیلڈ گنز استعمال کی جائیں گی۔

قومی پرچم لہرانے کے بعد فوج۔ بحریہ۔ فضائیہ اور دہلی پولیس کے اہلکاروں پر مشتمل قومی پرچم گارڈ کی جانب سے راشٹریہ سلامی پیش کی جائے گی۔ اس کے بعد فوجی بینڈ وندے ماترم پیش کرے گا اور لال قلعے میں موجود تمام افراد اس میں شامل ہوں گے۔ اس کے بعد قومی ترانہ پیش کیا جائے گا۔

ہندوستانی فضائیہ کے 2 ایم آئی 17 ہیلی کاپٹر تقریب کے مقام پر پھولوں کی پتیاں نچھاور کریں گے۔ ایک ہیلی کاپٹر قومی پرچم لے کر پرواز کرے گا جبکہ دوسرا وندے ماترم کی عکاسی کرنے والا پرچم لے کر پرواز کرے گا۔

وزیر اعظم اس کے بعد قوم سے خطاب کریں گے۔ یہ لال قلعے کی فصیل سے ان کا مسلسل 13واں یوم آزادی خطاب ہوگا۔ ان کی تقریر کے اختتام پر این سی سی کیڈٹس اور مائی بھارت کے رضاکار وندے ماترم پیش کریں گے۔ اس کے بعد قومی ترانہ بجایا جائے گا۔

تقریب میں فوج۔ بحریہ اور فضائیہ کے مجموعی طور پر 2500 لڑکے اور لڑکیاں کیڈٹس کے ساتھ مائی بھارت کے رضاکار شرکت کریں گے۔ وہ گیان پتھ پر بیٹھ کر وندے ماترم کے الفاظ کی شکل بنائیں گے۔ گیان پتھ پر ترقی یافتہ ہندوستان 2047 کے موضوع کو نمایاں کرنے والے ویو کٹرز بھی نصب کیے جائیں گے۔

مختلف شعبوں سے تعلق رکھنے والے تقریباً 5000 خصوصی مہمانوں کو بھی تقریب میں شرکت کی دعوت دی گئی ہے۔ ان میں خواتین کاروباری شخصیات۔ صفائی کارکن۔ ریڑھی پٹری والے۔ نوجوان اختراع کار۔ سائنس دان۔ اسٹارٹ اپ کے بانی۔ دستکار۔ کسان۔ طلبہ اور مختلف سرکاری اسکیموں سے فائدہ اٹھانے والے افراد شامل ہیں۔

مختلف ریاستوں اور مرکز کے زیر انتظام علاقوں سے تعلق رکھنے والے 1500 سے زیادہ افراد بھی روایتی لباس میں تقریب کا مشاہدہ کریں گے۔

عوام کی سہولت کے لیے بھی متعدد انتظامات کیے گئے ہیں۔ 6 مقامات پر 25 کلوک روم بنائے گئے ہیں۔ 200 رضاکاروں پر مشتمل ہیلپ ڈیسک قائم کیے گئے ہیں۔ میٹرو اسٹیشنوں اور پارکنگ مقامات پر وہیل چیئر کی سہولت بھی فراہم کی جائے گی۔

15 اگست کو میٹرو خدمات صبح 4 بجے شروع ہوں گی۔ مدعو افراد کے لیے سفر مفت ہوگا۔ درست پارکنگ لیبل رکھنے والے افراد کے لیے پریڈ گراؤنڈ میں پارکنگ کی سہولت بھی دستیاب ہوگی۔

لال قلعے میں نشستوں کے حصوں کے نام ہندوستان کی اہم جھیلوں کے نام پر رکھے گئے ہیں۔ ان میں چِلکا۔ ڈل۔ لوکتک۔ پینگونگ تسو۔ پشکر۔ ویمبناد اور وولر شامل ہیں۔

تقریب کے بعد لال قلعے میں صفائی کی خصوصی مہم بھی چلائی جائے گی جس میں این سی سی کیڈٹس اور مائی بھارت کے رضاکار حصہ لیں گے۔ ممکنہ بارش کے پیش نظر تقریب کے مقام کے آس پاس نکاسی آب اور سیوریج کے نظام کی بھی صفائی کی گئی ہے۔

یوم آزادی سے قبل وزارت دفاع۔ مائی گوو۔ دہلی حکومت کے مختلف محکموں اور دہلی پولیس نے حب الوطنی۔ قومی اتحاد۔ ہندوستان کی ترقی اور آزادی کی تحریک کے موضوعات پر کوئز۔ مقابلے اور دیگر سرگرمیاں منعقد کیں۔

سرکاری بیان کے مطابق ان مقابلوں کے تقریباً 600 فاتحین بھی یوم آزادی کی تقریب کا حصہ ہوں گے۔

حب الوطنی کے جذبے کو فروغ دینے کے لیے ملک بھر میں 343 اہم مقامات پر بینڈ کی خصوصی پیشکشیں بھی کی جا رہی ہیں۔ ان میں فوج۔ بحریہ۔ فضائیہ۔ کوسٹ گارڈ۔ این سی سی۔ مرکزی مسلح پولیس فورسز اور دیگر ادارے شامل ہیں۔ ان مقامات پر عوام کے داخلے کی اجازت ہے۔

انڈمان اور نکوبار جزائر اور لکشدیپ میں ہندوستانی بحریہ اور مقامی انتظامیہ کی جانب سے قومی پرچم لہرانے کی تقریبات بھی منعقد کی جائیں گی۔