سری نگر: جموں و کشمیر میں مرکز کے زیر انتظام خطے کی سطح کی اعلیٰ اختیاراتی اسٹیئرنگ کمیٹی (یو ٹی ایچ پی ایس سی) نے منگل کو تقریباً 2,700 کروڑ روپے کی تین بڑی شہری ترقیاتی منصوبوں کو منظوری دے دی۔ ایک سرکاری ترجمان نے بتایا کہ محکمہ ہاؤسنگ اینڈ اربن ڈیولپمنٹ (ایچ اینڈ یو ڈی ڈی) کی جانب سے نشان زد کیے گئے ان منصوبوں میں جموں کا ’ترنگ‘ (تاوی علاقے کی بحالی اور گرین ڈیولپمنٹ)، دیواروں میں گھرا سری نگر کا پرانا علاقہ (والڈ سٹی) اور نگین لیک فرنٹ کی بحالی، جبکہ ریاسی کا ’کرپا‘ (مربوط یاتری سہولتوں کے ذریعے کٹرا کی بحالی) شامل ہیں۔

انہوں نے بتایا کہ ان منصوبوں کو اس طرح تیار کیا گیا ہے کہ سرکاری سرمایہ کاری کے ساتھ مارکیٹ پر مبنی مالی اعانت اور نجی شعبے کی شراکت داری کو بھی شامل کیا جا سکے، تاکہ جدید، پائیدار اور معاشی طور پر فعال شہری علاقوں کو فروغ دیا جا سکے۔

حکام نے بتایا کہ جموں و کشمیر میں پائیدار اور سرمایہ کاری پر مبنی شہری ترقی کو تیز کرنے کی سمت ایک اہم قدم کے طور پر چیف سیکریٹری اتل ڈلو کی صدارت میں کمیٹی (یو ٹی ایچ پی ایس سی) نے حکومت ہند کے ’اربن چیلنج فنڈ‘ (یو سی ایف) کے تحت مجموعی طور پر 2,692.58 کروڑ روپے کی تخمینہ لاگت والی تین بڑی شہری ترقیاتی منصوبوں کو منظوری دی ہے۔

ترجمان نے کہا کہ یہ منظوری بڑے پیمانے پر ترقی کے لیے اضافی ادارہ جاتی، بلدیاتی اور نجی سرمایہ کاری کے راستے کھولنے کے ساتھ ساتھ، تبدیلی لانے والے شہری بنیادی ڈھانچے کے لیے اربن چیلنج فنڈ کے فریم ورک سے فائدہ اٹھانے کی جموں و کشمیر کی کوششوں میں ایک اہم پیش رفت ہے۔