امپھال/ آواز دی وائس 

منی پور میں مختلف تنظیموں سے وابستہ تین عسکریت پسندوں کو گرفتار کیا گیا ہے۔ پولیس نے منگل کو یہ اطلاع دی۔

پولیس نے بتایا کہ کالعدم تنظیم پیپلز لبریشن آرمی (پی ایل اے) کے ایک سرگرم رکن کو پیر کے روز امفال ویسٹ ضلع کے کدنگ بند میں اس کے گھر کے قریب سے گرفتار کیا گیا۔

اس کی شناخت سنسم سنتومبا سنگھ (54) کے طور پر ہوئی ہے۔ پولیس کے مطابق اس کے پاس سے دو انساس لائٹ مشین گن میگزین، دو کیموفلاج ہیلمٹ (چھپنے میں مددگار)، پانچ بلٹ پروف پلیٹ اور چار بلٹ پروف جیکٹ برآمد کیے گئے ہیں۔

پی ایل اے بنیادی طور پر پڑوسی ملک میانمار میں اپنے کیمپوں سے سرگرم ہے اور اسے سکیورٹی فورسز پر حملوں کے کئی واقعات کے لیے ذمہ دار ٹھہرایا گیا ہے۔

پولیس نے بتایا کہ کالعدم تنظیم این آر ایف ایم کے ایک سرگرم رکن کو بشنپور ضلع کے خوئی جومن سے گرفتار کیا گیا۔

کالعدم تنظیم کانگلی یاول کننا لوپ کے ایک رکن کو امفال ویسٹ ضلع کے پاؤنا بازار سے گرفتار کیا گیا۔

اس کی شناخت اوریخنبام پریم جیت سنگھ (41) کے طور پر ہوئی ہے اور وہ مبینہ طور پر وادی میں مقامی کاروباروں سے بھتہ خوری میں ملوث تھا۔

اسی دوران، پولیس نے بتایا کہ امپھال ہوائی اڈے پر دو مسافروں کو گرفتار کیا گیا اور ان کے پاس سے 21.42 کلو گرام بھنگ برآمد کی گئی۔

پولیس نے بتایا کہ ان کے سامان میں منشیات چھپی ہوئی تھیں۔

پولیس نے مزید بتایا کہ ملزمان کی شناخت لیش رام وکاس سنگھ (20) اور ننگ بام نیلسن میتی (19) کے طور پر ہوئی ہے۔