پٹنہ/ آواز دی وائس
بہار کی راجدھانی پٹنہ کے تخت سری ہر مندِر صاحب کو آر ڈی ایکس سے اڑانے کی دھمکی ملی ہے۔ اس دھمکی کے بعد پورے ہر مندِر صاحب گردوارہ میں ہائی الرٹ جاری کر دیا گیا ہے۔ جی میل سے موصول اس دھمکی کے بعد انتظامیہ کمیٹی کے ارکان نے اس کی اطلاع پٹنہ کے ضلع افسر، سینئر پولیس سپرنٹنڈنٹ، پٹنہ سٹی کے ایڈیشنل پولیس افسر اور چوک تھانہ انچارج کو دی۔ اطلاع ملتے ہی پٹنہ کے بم ڈسپوزل اسکواڈ کی ایک ٹیم نے تخت سری ہر مندِر صاحب کا معائنہ کیا۔
دھمکی کا میل کس نے اور کہاں سے بھیجا؟
بم ڈسپوزل اسکواڈ کی جانچ میں فی الحال کچھ بھی ہاتھ نہیں لگا ہے۔ اس معاملے میں پٹنہ سٹی کے چوک تھانہ انچارج منجیت ٹھاکر نے بتایا کہ تخت سری ہر مندِر صاحب کے ایک افسر کے میل پر پٹنہ صاحب کو آر ڈی ایکس سے اڑانے کی دھمکی دی گئی تھی۔ انہوں نے بتایا کہ اطلاع ملتے ہی پورے گردوارہ احاطے کی گہرائی سے تلاشی لی گئی۔ اب پولیس اس بات کا پتہ لگانے میں مصروف ہے کہ یہ میل کس نے اور کہاں سے بھیجا۔
ای میل میں کیا لکھا تھا...
انتظامیہ کمیٹی کے جگجیت سنگھ نے بتایا کہ میل میں لکھا گیا تھا کہ آپ کے گرو لنگر کمروں میں چار آر ڈی ایکس پر مبنی آئی ای ڈیز موجود ہیں۔ دھماکے سے پہلے وی آئی پیز اور ملازمین کو فوراً باہر نکال لیں۔" اس میل کے بعد پورے گردوارہ احاطے میں افرا تفری مچ گئی۔ انتظامیہ کمیٹی کے ارکان نے اس کی اطلاع انتظامیہ کو دی۔ اس کے بعد انتظامیہ نے پورے ہر مندِر صاحب احاطے کے چاروں طرف تلاشی مہم چلائی۔ تلاشی کے دوران یہاں درشن کے لیے آنے والے لوگوں کو عارضی طور پر روک دیا گیا تھا۔
جگجیت سنگھ نے بتایا کہ کسی بھی ناخوشگوار واقعے کو ذہن میں رکھتے ہوئے حفاظتی وجوہات کی بنا پر کچھ دیر کے لیے لوگوں کو احتیاط برتنے کی اپیل کی گئی تھی۔ فی الحال مکمل جانچ کے بعد کچھ بھی مشکوک نہیں پایا گیا ہے۔ اس سے ظاہر ہوتا ہے کہ کسی شرارتی عنصر نے یہ فیک ای میل بھیجا تھا۔
