نئی دہلی: مرکزی وزیر برائے سڑک ٹرانسپورٹ اور شاہراہیں نتن گڈکری نے بدھ کے روز کہا کہ غلط تفصیلی پروجیکٹ رپورٹ (DPR) تیار کرنے والے کنسلٹنٹ شاہراہوں پر ہونے والے حادثات اور ان کے نتیجے میں ہونے والی اموات کے لیے ’’ذمہ دار‘‘ ہیں۔

انہوں نے تعمیراتی معیار پر سمجھوتہ کرنے والے ٹھیکیداروں کو ’بلیک لسٹ‘ کرنے سمیت دیگر کارروائی کی وارننگ بھی دی۔ قومی دارالحکومت میں صنعتی تنظیم فکی (FICCI) کی جانب سے منعقدہ ’ٹنلز اینڈ برجز کانفرنس 2026‘ کے چوتھے ایڈیشن سے خطاب کرتے ہوئے سڑک ٹرانسپورٹ اور شاہراہوں کے وزیر نے غلط ڈی پی آر تیار کرنے والوں کو ’’ذمہ دار‘‘ قرار دیا۔

انہوں نے الزام لگایا کہ کنسلٹنٹ گوگل کی مدد سے یہ دستاویزات تیار کرتے ہیں، جس کی وجہ سے جان و مال کا نقصان ہو رہا ہے۔ گڈکری نے کہا، ’’ڈی پی آر کا معیار اتنا خراب ہے کہ آج سڑکوں پر پانچ لاکھ حادثات ہوتے ہیں اور 1.8 لاکھ افراد ہلاک ہوتے ہیں، اور ان تمام معاملات میں غلط ڈی پی آر کا مسئلہ موجود ہے۔‘‘ وزیر نے ٹھیکیداروں کو بنیادی ڈھانچے کے منصوبے حاصل کرنے کے بعد تعمیراتی معیار پر سمجھوتہ کرنے سے بھی خبردار کیا۔

انہوں نے کہا کہ مالیاتی آڈٹ کے علاوہ کارکردگی کا بھی آڈٹ کیا جائے گا اور اس کے نتائج کی بنیاد پر ٹھیکیداروں کے خلاف کارروائی کی جائے گی اور انہیں ’بلیک لسٹ‘ کیا جائے گا۔ مرکزی وزیر نے کہا کہ ان تمام وجوہات سے معاشی نقصان ہوتا ہے اور سڑک حادثات میں لوگوں کی جانیں جا رہی ہیں۔ گڈکری نے کہا کہ ٹھیکیداروں اور ڈی پی آر کنسلٹنٹس کو ریٹنگ دی جائے گی اور اسی بنیاد پر فیصلہ کیا جائے گا کہ انہیں مستقبل میں ہونے والی بولیوں میں حصہ لینے کی اجازت دی جائے یا نہیں۔