نئی دہلی/ آواز دی وائس

مرکزی حکومت نائب صدر کی زیڈ پلس سیکیورٹی دہلی پولیس کے بجائے مرکزی ریزرو پولیس فورس (سی آر پی ایف) کو سونپنے کی منصوبہ بندی کر رہی ہے۔ یہ اہم اطلاع انڈین ایکسپریس کو موصول ہوئی ہے۔ اطلاع کے مطابق، نئے خطرے کی معلومات ملنے اور سیکیورٹی کے جائزے کے بعد حکومت اس پر کام کر رہی ہے۔

ذرائع نے بتایا کہ 9 ستمبر کو نائب صدر کے انتخاب سے قبل ایک مشترکہ سیکیورٹی جائزہ میٹنگ کے دوران سی آر پی ایف کے افسران نے دہلی پولیس کے افسران کو اس منصوبے سے آگاہ کیا۔ میٹنگ میں خفیہ ایجنسیوں اور نیم فوجی دستوں کے نمائندے بھی شامل تھے۔

ذرائع نے بتایا کہ یہ کہا گیا کہ سی آر پی ایف وی پی انکلیو کمپلیکس کے اندر کمانڈو تعینات کرے گی، جبکہ دہلی پولیس قافلے کے راستے کی کلیئرنس کا کام سنبھالے گی۔‘‘ انہوں نے کہا کہ ابھی تک کوئی باضابطہ اطلاع نہیں ملی ہے۔ صحت کے مسائل کے باعث جولائی میں جگدیپ دھنکھڑ کے عہدے سے استعفیٰ دینے کی وجہ سے نائب صدر کا انتخاب 9 ستمبر کو ہوگا۔

پروٹوکول کے مطابق، نائب صدر کو دہلی پولیس کے سیکیورٹی ونگ سے زیڈ پلس سیکیورٹی فراہم کی جاتی ہے، جس میں اسسٹنٹ پولیس کمشنر کے عہدے کے تین افسران نجی سیکیورٹی افسر کے طور پر شامل ہوتے ہیں۔ وزیراعظم اور ان کے اہل خانہ کے لیے اسپیشل پروٹیکشن گروپ (ایس پی جی) کے بعد یہ ملک میں دوسری سب سے بڑی سیکیورٹی کیٹیگری ہے۔ زیڈ پلس کیٹیگری میں تقریباً 50 اہلکار شفٹوں میں کام کرتے ہیں اور ان کی رہائش اور قافلے کے لیے بہتر انتظامات کیے جاتے ہیں۔

صدر، نائب صدر اور وزیراعظم کے لیے سیکیورٹی پروٹوکول اسپیشل پروٹیکشن گروپ ایکٹ کے تحت وزارتِ داخلہ کی جانب سے جاری کردہ ’’بلو بک‘‘ میں دیے گئے رہنما اصولوں پر مبنی ہوتا ہے۔ ایک افسر نے بتایا، ’’جائزہ میٹنگ کے دوران دہلی پولیس کو بتایا گیا کہ بلو بک میں کچھ ترامیم کرنے کا عمل جاری ہے۔‘‘

گزشتہ سال، وزارتِ داخلہ نے پارلیمنٹ کی ڈیوٹی سے ہٹائے گئے خصوصی تربیت یافتہ اہلکاروں کی ایک نئی بٹالین کو سی آر پی ایف کے وی آئی پی سیکیورٹی ونگ میں تعینات کرنے کی منظوری دی تھی۔ افسر نے بتایا کہ گزشتہ سال مرکزی وزیرِ داخلہ امیت شاہ کی سیکیورٹی کا جائزہ لینے کے بعد، سی آر پی ایف نے دہلی پولیس سے سیکیورٹی کی ذمہ داری سنبھال لی۔ اب دہلی پولیس صرف داخلی دروازے پر تعینات ہے۔