نئی دہلی: اتر پردیش کے وزیر اعلیٰ یوگی آدتیہ ناتھ نے ہفتہ کو ریاست کے عوام کو یقین دلایا کہ ریاست میں چینی کی کوئی کمی نہیں ہے، اس لیے لوگوں کو پریشان ہونے کی ضرورت نہیں۔ ایک سرکاری بیان میں یہ اطلاع دی گئی۔

بیان کے مطابق یوگی آدتیہ ناتھ نے کہا کہ ریاست کی شوگر ملوں میں اس وقت 179.38 لاکھ کوئنٹل چینی کا ذخیرہ موجود ہے۔ انہوں نے بتایا کہ شوگر ملوں نے جون اور جولائی کے دوران 235 لاکھ کوئنٹل چینی فروخت کی ہے۔ وزیر اعلیٰ نے ایک جائزہ اجلاس میں کہا کہ کوآپریٹو شوگر ملوں میں 23.60 لاکھ کوئنٹل، کارپوریشن کی شوگر ملوں میں 5.28 لاکھ کوئنٹل اور نجی شوگر ملوں میں 150.50 لاکھ کوئنٹل چینی دستیاب ہے۔

انہوں نے کہا کہ جون اور جولائی میں شوگر ملوں کی جانب سے فروخت کی گئی 235 لاکھ کوئنٹل چینی کا بیشتر حصہ اب بھی کھلی مارکیٹ میں دستیاب ہے۔ ضرورت پڑنے پر شوگر ملوں کو 15 اکتوبر سے دوبارہ چلانے کی ہدایت دی جائے۔ یوگی آدتیہ ناتھ نے عوام سے اپیل کی کہ چینی کی قلت کی افواہیں پھیلا کر لوگوں کو گمراہ کرنے والوں سے محتاط رہیں۔ انہوں نے انتظامی افسران کو چینی کی کالابازاری کرنے اور افواہیں پھیلانے والوں کے خلاف سخت کارروائی کرنے کی ہدایت بھی دی۔