نئی دہلی/ آواز دی وائس
دہلی کے آبپاشی و سیلاب کنٹرول وزیر پرویش ورما نے بدھ کو کہا کہ دہلی حکومت نے پچھلے چھ ماہ میں جمنا دریا کی پانی گزارنے کی صلاحیت بڑھانے کے لیے کئی اقدامات کیے ہیں۔ آئی ٹی او بیراج کے معائنہ کے دوران وزیر نے عوام کو یقین دلایا کہ جمنا دریا کے بڑھتے ہوئے پانی کی سطح کو لے کر گھبرانے یا فکر کرنے کی کوئی ضرورت نہیں ہے، کیونکہ صورتحال قابو میں ہے۔
ورما نے صحافیوں سے کہا کہ پچھلے چھ ماہ میں دریا کی پانی گزارنے کی صلاحیت بڑھانے کے لیے مختلف محکموں کی جانب سے اقدامات کیے گئے ہیں۔ فی الحال صورتحال قابو میں ہے اور اگر پانی کی سطح ایک یا دو میٹر اور بڑھ بھی جائے تو بھی 2023 کی طرح دہلی کی سڑکوں پر پانی نہیں آئے گا۔
بدھ کی صبح آٹھ بجے پرانے ریلوے پل (او آر بی) پر جمنا دریا کی سطح 206.83 میٹر ریکارڈ کی گئی، جو نکاسی کے نشان 206 میٹر سے اوپر ہے۔ پانی کی سطح بڑھنے کے باعث ضلعی انتظامیہ نچلے علاقوں میں رہنے والے لوگوں کو محفوظ مقامات پر منتقل کر رہا ہے اور او آر بی کو ٹریفک کے لیے بند کر دیا گیا ہے۔
وزیر نے کہا کہ جمنا دریا کا پانی مجاز علاقے میں بنے کسی بھی مکان میں داخل نہیں ہوا ہے۔ سیلابی پانی انہی مکانوں میں گھسا ہے جنہوں نے پہلے سے انتباہ دیے جانے کے باوجود سیلابی علاقے میں اپنے گھر بنائے۔ ہماری ریسکیو ٹیمیں کام کر رہی ہیں۔ اگر پانی کی سطح 209 میٹر تک بھی پہنچ جائے تو بھی مجاز علاقے میں بنے مکانوں میں سیلابی پانی داخل نہیں ہوگا۔ ہمیں امید ہے کہ شام تک پانی کی سطح کم ہونا شروع ہو جائے گی۔
حکومت کے مطابق تین بیراجوں – ہتھنی کنڈ، وزیرآباد اور اوکھلا – سے پانی کے بہاؤ کی مسلسل 24 گھنٹے نگرانی کی جا رہی ہے۔
