لکھنؤ/ آواز دی وائس

اتر پردیش میں اسسٹنٹ پروفیسر کا امتحان منسوخ کر دیا گیا ہے۔ دراصل، یوپی ایس ٹی ایف کو اسسٹنٹ پروفیسر کے امتحان میں دھاندلی اور غیر قانونی رقم وصولی کے شواہد ملے تھے۔ دھاندلی کے الزامات سامنے آنے کے بعد حکومت نے یہ امتحان منسوخ کرنے کا فیصلہ کیا۔

وزیر اعلیٰ یوگی نے دیے تھے جانچ کے احکامات

پریس ریلیز کے مطابق، ایس ٹی ایف کو اتر پردیش ایجوکیشن سروس سلیکشن کمیشن، پریاگ راج کی جانب سے اشتہار نمبر 51 کے تحت اسسٹنٹ آچاریا کے عہدے کے لیے اپریل 2025 میں منعقدہ امتحان کے سلسلے میں بے ضابطگیوں، دھاندلی اور غیر قانونی رقم وصولی سے متعلق اطلاعات موصول ہوئی تھیں۔ معاملے کی سنگینی کو دیکھتے ہوئے وزیر اعلیٰ یوگی آدتیہ ناتھ نے خفیہ جانچ کے احکامات دیے۔

موصولہ اطلاعات کی بنیاد پر کارروائی کرتے ہوئے 20-04-2025 کو ایس ٹی ایف نے اسسٹنٹ پروفیسر امتحان کے جعلی سوالیہ پرچے بنا کر امیدواروں سے دھوکہ دہی کرنے والے ایک گینگ کے تین ملزمان—محبوب علی، بیجناتھ پال اور ونئے پال—کو گرفتار کیا۔ ملزمان پر امتحان میں دھاندلی اور غیر قانونی رقم وصولی کے الزامات ہیں۔ یہ امتحان 16-04-2025 اور 17-04-2025 کو منعقد ہوا تھا۔

اتر پردیش ایجوکیشن سلیکشن کمیشن کا ملازم بھی گرفتار

اس معاملے میں ایس ٹی ایف نے ملزمان کے خلاف لکھنؤ میں مقدمہ درج کرایا۔ جانچ کی غیر جانبداری اور رازداری کو یقینی بنانے کے مقصد سے اُس وقت کی کمیشن چیئرپرسن سے استعفیٰ لیا گیا، کیونکہ ملزم محبوب علی سابق چیئرپرسن کا خفیہ معاون تھا۔ تفتیش کے دوران محبوب علی نے اعتراف کیا کہ اس نے ماڈریشن کے عمل کے دوران مختلف مضامین کے سوالیہ پرچے حاصل کر لیے تھے، جنہیں اس نے مختلف ذرائع سے رقم لے کر کئی امیدواروں کو فراہم کیا۔ محبوب علی کے اعتراف کی ایس ٹی ایف کی گہری تفتیش اور ڈیٹا اینالیسس سے تصدیق ہوئی ہے۔

تحقیقات کے بعد ملزمان کے پاس سے ملنے والے کچھ امیدواروں کے موبائل نمبروں کی بنیاد پر کئی دیگر ملزمان کے نام بھی سامنے آئے۔ اس کے بعد کمیشن کو خط لکھ کر مشتبہ امیدواروں کا ڈیٹا طلب کیا گیا۔ امتحان میں دھاندلی کی تصدیق ہونے کے بعد حکومت نے اسے منسوخ کرنے کا فیصلہ کیا۔