آگرہ :فتح پور سیکری  میں حضرت بابا شیخ سلیم چشتی فریدی رحمۃ اللہ علیہ کے 456 ویں سالانہ عرس مبارک کا پیر کو روایتی طریقے سے باقاعدہ آغاز ہو گیا۔ یہ تقریب 16 ویں نسل کے حضرت پیرزادہ عیاض الدین چشتی المعروف رئیس میاں سجادہ نشین درگاہ حضرت شیخ سلیم چشتی کی سرپرستی اور سجادہ نشین پیرزادہ ارشد عظیم فریدی چشتی کی موجودگی میں منعقد ہوئی۔

اس موقع پر مختلف مذاہب سے تعلق رکھنے والے ہزاروں مریدین اور عقیدت مندوں نے شرکت کی اور اپنی عقیدت کا اظہار کیا۔ درگاہ کے سجادہ نشین نے خطاب کرتے ہوئے بتایا کہ مغل بادشاہ جلال الدین اکبر نے اولاد کی دعا کے لیے اسی مقام پر حاضری دی تھی اور اس دعا کے نتیجے میں شہزادہ سلیم کی پیدائش ہوئی جس کا ذکر تاریخ میں سنہری حروف میں کیا گیا ہے۔ اسی واقعے کے بعد سے ہر مذہب کے لوگ یہاں اولاد کی دعا کے لیے آتے ہیں اور ان کی مرادیں پوری ہوتی رہی ہیں۔

مہمانوں کا استقبال کرتے ہوئے سجادہ نشین پیرزادہ ارشد عظیم فریدی نے عرس کی تفصیلات بتائیں۔ انہوں نے کہا کہ عرس کی رسمی شروعات 20 رمضان المبارک کو نماز فجر کے بعد غسل شریف کی تقریب سے مزار حضرت شیخ سلیم چشتی پر ہوئی۔ اس موقع پر چلہ گاہ حضرت سلیم چشتی المعروف منڈف میں حضور اکرم صلی اللہ علیہ وسلم کے قدم مبارک موئے مبارک حضرت پیران پیر دستگیر حضور غوث پاک کا خرقہ مبارک حضرت بابا فرید الدین گنج شکر کا پٹکا شریف حضرت شیخ کی کلاہ مبارک اور قلمی شبیہ کی زیارت سجادہ نشین کے ہاتھوں کرائی گئی۔

تاریخی روایات کے مطابق حضرت شیخ سلیم چشتی تقریباً 24 سال تک مدینہ منورہ اور خانہ کعبہ میں مقیم رہے اور وہاں امامت کے فرائض انجام دیتے رہے۔ آپ نے بیت المقدس میں بھی خدمات انجام دیں۔ بعد ازاں حضور اکرم صلی اللہ علیہ وسلم کی بشارت کے مطابق آپ کو حکم ہوا کہ سیکری کی پہاڑی پر جا کر تبلیغ اسلام کریں۔ اس حکم کے بعد آپ ہندوستان کے سفر پر روانہ ہوئے اور اپنے ساتھ کئی مقدس تبرکات بھی لائے۔

سفر کے دوران آپ بغداد شریف بھی گئے جہاں حضرت غوث اعظم کی درگاہ پر حاضری دی۔ روایت کے مطابق وہاں کے سجادہ نشین کو ہدایت دی گئی کہ سلیم کی امانت سلیم کو دے دی جائے۔ اس طرح حضرت غوث پاک کا خرقہ مبارک بھی آپ کو عطا ہوا اور سلسلہ قادریہ کی خلافت بھی مرحمت کی گئی۔

عرس کی تقریبات کے تحت 21 سے 28 رمضان المبارک تک روزانہ نماز عشاء کے بعد محفل میلاد شریف منعقد کی جائے گی۔ اسی مدت میں بلند دروازہ پر خصوصی مجالس بھی ہوں گی جہاں عقیدت مندوں میں صند نان کھتائی اور لنگر تقسیم کیا جائے گا۔ 27 رمضان کو نشست گاہ سجادہ نشین میں قدیم روایت کے مطابق محفل سما منعقد ہوگی جبکہ 28 رمضان کو کچہری میں محفل میلاد شریف کا انعقاد ہوگا۔

29 رمضان المبارک کی صبح صادق ساڑھے تین بجے مزار شریف پر قل شریف کی رسم ادا کی جائے گی۔ اس موقع پر سجادہ نشین اپنے مریدین اور صوفیائے عظام کے ساتھ شرکت کریں گے اور بعد ازاں صوفی بزرگوں میں تبرکات تقسیم کیے جائیں گے۔

عرس کے بعد 24 اور 25 مارچ کو رنگ صوفیانہ تقریب کا انعقاد بھی کیا جائے گا جس میں ملک بھر سے ممتاز صوفی دانشور شعرا اور صوفی فنکار شرکت کریں گے اور اپنے کلام کے ذریعے محبت امن رواداری اور اخوت کا پیغام عام کریں گے۔