نئی دہلی: سپریم کورٹ نے پیر کو مہاراشٹر کی سات فیملی عدالتوں کے ججوں کی اس درخواست پر سماعت سے انکار کر دیا، جس میں انہوں نے آئین کے آرٹیکل 217 کے تحت ہائی کورٹ میں جج مقرر کیے جانے کے لیے اپنے ناموں پر غور کرنے کی ہدایت دینے کی درخواست کی تھی۔ درخواست گزاروں نے دلیل دی تھی کہ فیملی عدالتوں کے جج ہونے کی حیثیت سے وہ ہندوستان کے علاقے میں ’’عدالتی عہدے‘‘ پر فائز ہیں اور عدالتی فرائض انجام دیتے ہیں، اس لیے ہائی کورٹ میں جج مقرر کیے جانے کے لیے ان کے ناموں پر غور کیا جانا چاہیے۔ چیف جسٹس سوریہ کانت، جسٹس جوی مالیا باگچی اور جسٹس وی موہنا کی بینچ نے کہا کہ ’’مسئلہ فیملی عدالتوں کے لیے الگ کیڈر تشکیل دینے کا ہے۔‘‘

عدالت نے سوال کیا کہ جب حقائق یا قانونی صورت حال میں کوئی تبدیلی نہیں ہوئی ہے تو سابقہ فیصلوں پر دوبارہ غور کیسے کیا جا سکتا ہے۔ بینچ نے کہا، ’’ممکنہ طور پر درخواست گزاروں کے پاس یہی راستہ ہے کہ وہ متعلقہ ہائی کورٹ اور ریاستی حکومت سے فیملی عدالتوں کے پریزائیڈنگ افسران کی تقرری کے قواعد ازسرنو مرتب کرنے کی درخواست کریں، خاص طور پر دیگر ریاستوں میں ایسی تقرریوں کے لیے نافذ دفعات کو مدنظر رکھتے ہوئے۔‘‘ عدالت نے مزید کہا، ’’ہم یہ بھی واضح کرنا چاہتے ہیں کہ یہ بنیادی طور پر پالیسی کا معاملہ ہے اور متعلقہ ہائی کورٹ اور ریاستی حکومت باہمی مشاورت سے اس سلسلے میں مناسب قدم اٹھا سکتے ہیں۔‘

‘ درخواست گزاروں کی جانب سے پیش ہونے والے سینئر وکیل آر. بسنت نے کہا کہ درخواست میں آئین کے آرٹیکل 217 کی تشریح سے متعلق اہم سوال شامل ہے۔ آئین کا آرٹیکل 217 ہائی کورٹس کے ججوں کی تقرری، اہلیت، مدتِ کار اور ملازمت کی شرائط سے متعلق ہے۔ بسنت نے کہا کہ درخواست گزار ہائی کورٹ سے رجوع نہیں کر سکتے کیونکہ سپریم کورٹ کا پہلے سے ایک فیصلہ موجود ہے، جس کی وجہ سے انہیں وہاں کوئی راحت نہیں مل سکتی۔

سپریم کورٹ پہلے ہی قرار دے چکی ہے کہ فیملی عدالتوں کے جج وسیع معنوں میں عدالتوں کی سربراہی کرنے والے ’’جج‘‘ ہو سکتے ہیں، لیکن وہ ریاست کی ’’عدالتی سروس‘‘ کے رکن یا اس کا لازمی حصہ نہیں ہیں۔ عدالت نے یہ بھی کہا تھا کہ وہ آرٹیکل 217 کے تحت متصور ’’عدالتی عہدے‘‘ پر فائز نہیں ہوتے، اس لیے ہائی کورٹ میں جج مقرر کیے جانے کے لیے ان کے ناموں پر غور کیے جانے کا انہیں کوئی حق حاصل نہیں ہے۔