ممبئی: اے آئی یو ایم ایل نے ’جرنی آف ہارمنی انڈیا‘شروع کیا ہے جس کے تحت ملک کو قومی ہم آہنگی کا پیغام دیا جارہاہے۔ ملک بھر میں اجتماعات ہورہے ہیں اور ہندو، مسلم، سکھ، عیسائی کو ایک دوسرے سے قریب لانے کی کوشش ہورہی ہے۔ اس میں شامل لوگوں کو کہنا ہے کہ اس قسم کا پروگرام بہت پہلے شروع ہونا چاہئے۔

انڈین یونین مسلم لیگ کی قومی سیاسی مشاورتی کمیٹی کے چیئرمین اور ریاست کیرالہ کے صدر پنکڈ سید صادق علی شہاب تھنگل نے ممبئی میں ایک ہم آہنگی کانفرنس کی میزبانی کی، جس میں بھائی چارے کے ایک نئے باب کا آغاز ہوا۔

۔’جرنی آف ہارمنی انڈیا‘ ممبئی کے دل کو چھو گیا۔ کیرالہ، بنگلور اور چنئی کے تمام اضلاع میں منعقد ہونے والے دوستانہ اجتماعات کے بعد، کل ممبئی کے حج ہاؤس میں منعقد ہونے والے اجتماع میں مذہبی، فرقہ وارانہ، سیاسی، اور ثقافتی، رہنماؤں اور فنکاروں کی شرکت کے بیچ ہم آہنگی اور بقائے باہمی کے اصولوں کو برقرار رکھنے کا عزم کیا گیا۔

سید صادق علی تھنگل نے کہا کہ مسلم لیگ برادریوں کے درمیان ہم آہنگی اور بھائی چارے کو یقینی بنانے کے لیے پرعزم ہے۔ مسلم لیگ جمہوریت اور سیکولرازم پر یقین رکھنے والوں کے ساتھ ہاتھ ملا کر پارلیمنٹ میں، عدالتوں میں اور سڑکوں پر عوام کے لئےانصاف کی جنگ لڑ رہی ہے۔

جنوبی ممبئی کے حج ہاؤس میں لیگ کی طرف سے بلائی گئی ایک میٹنگ سے خطاب کرتے ہوئے، ایک سینئر عالم اور آل انڈیا مسلم پرسنل لاء بورڈ کے کارکن مولانا خلیل الرحمن سجاد نعمانی نے کہا کہ یہ بہت پہلے ہو جانا چاہیے تھا۔ ہمیں تسلیم کرنا چاہیے کہ نفرت اتنی تیزی سے پھیل رہی ہے کیونکہ ہم نے اسے پہلے سنجیدگی سے نہیں لیا اور ماحول کو خراب ہونے دیا۔ یہ کبھی نہ ہونے سے بہتر ہے اور ہمیں اب تیزی سے کام کرنا چاہیے کہ بہت کچھ ہو چکا ہے۔

عبدالرحمن سی ایچ نے کہا کہ یہ وقت کی ضرورت ہے۔ ہم نے کیرالہ سے آغاز کیا اور اس پیغام کے ساتھ ملک کے مختلف حصوں تک پہنچنے کا منصوبہ بنایا کہ ہم آہنگی کو مسلسل کوششوں کے ذریعے برقرار رکھا جا سکتا ہے کیونکہ ایسی طاقتیں ہیں جو نہیں چاہتیں کہ ہندوستانی لوگ امن اور ہم آہنگی سے رہیں۔ اب تک، ہماری کوششیں کافی کامیاب رہی ہیں اور لوگوں کا ردعمل زبردست رہا ہے۔

جب کہ کیرالہ اسمبلی کے ڈپٹی اپوزیشن لیڈر پی کے کنہہ علی کٹی، ای ٹی محمد بشیر ایم پی، عبدالصمد صمدانی ایم پی، پی وی عبدالوہاب ایم پی، ایچ جی گیورگیس مار کوریلوز میٹرو پولیٹا، راشٹریہ سکھ مورچہ کے صدر ہربندر سنگھ، جین ویراگ ساگر، وینول بھیک، عباس بھیک، ایم پی۔ایڈوکیٹ یوسف مچھالا، جیجی تھامسن آئی اے ایس سابق چیف سکریٹری کیرالہ حکومت۔ پارسی کمیونٹی کی نمائندگی کرنے والے ڈاکٹر سائرس دستور، جوگندر سنگھ، وجے کنڈارے، شاکر شیخ، ممبئی امن کمیٹی کے فرید شیخ وغیرہ نے خطاب کیا۔