نئی دہلی
کرناٹک میں قیادت کی تبدیلی کی خبروں کے درمیان ریاست کے وزیر داخلہ جی۔ پرمیشور نے منگل کے روز کہا کہ کانگریس اعلیٰ قیادت جلد ہی اس معاملے پر ’’ردِعمل‘‘ دے گی۔انہوں نے کہا کہ پارٹی اعلیٰ قیادت کی جانب سے لیا گیا کوئی بھی فیصلہ سب کو قبول ہوگا۔
پرمیشور نے صحافیوں سے بات کرتے ہوئے کہا کہ ہماری پارٹی کی اعلیٰ قیادت تمام معاملات پر جلد از جلد ردِعمل دے گی۔ ہماری طرف سے کوئی ابہام نہیں ہے۔ 2023 میں ہم نے عوام سے جو وعدے کیے تھے، انہیں مناسب پروگراموں کے ذریعے پورا کیا جا رہا ہے اور ہم ان سب کو نافذ کرنے کے لیے پُرعزم ہیں۔
جب صحافیوں نے ان سے پوچھا کہ کیا وزیر اعلیٰ کے مضبوط دعویدار اور نائب وزیر اعلیٰ ڈی۔ کے۔ شیوکمار کو پارٹی اعلیٰ قیادت کی طرف سے سالگرہ کا تحفہ ملے گا، تو پرمیشور نے کہا کہ اعلیٰ قیادت کا کوئی بھی فیصلہ پارٹی کے تمام اراکین کے لیے قابلِ قبول ہوگا اور سب اس کی حمایت کریں گے۔
دلت وزیر اعلیٰ کے مطالبے سے متعلق سوال پر انہوں نے کہا کہ لوگ اپنے پیار اور اعتماد کی بنیاد پر رائے کا اظہار کرتے ہیں۔تاہم، انہوں نے یہ بھی کہا کہ کانگریس کی اعلیٰ قیادت ان تمام آرا پر غور کرتی ہے۔
