نئی دہلی: کانگریس صدر ملکارجن کھرگے نے بدھ کے روز نریندر مودی حکومت پر نوجوانوں کا مستقبل برباد کرنے کا الزام عائد کیا اور کہا کہ کانگریس کو مستقبل کی تیاری کے پیش نظر نوجوانوں کے لیے ایک واضح، جامع اور وقت مقررہ پر مبنی ’’ایجوکیشن ٹو ایمپلائمنٹ روڈ میپ‘‘ یعنی تعلیم سے روزگار تک کا منصوبہ تیار کرنا چاہیے۔

انہوں نے کانگریس ورکنگ کمیٹی (سی ڈبلیو سی) کے اجلاس میں اپنی صدارتی تقریر کے دوران رام مندر کے چندے میں مبینہ چوری کا معاملہ بھی اٹھایا اور الزام لگایا کہ وزیر اعظم نریندر مودی اس معاملے پر خاموش ہیں۔ کھرگے نے کہا کہ صرف چند لوگوں کو جیل بھیج دینے سے معاملہ ختم نہیں ہوگا اور وزیر اعظم کو اس موضوع پر جواب دینا چاہیے۔ کانگریس صدر نے کہا کہ ہندوستان دنیا کا سب سے نوجوان ملک ہے اور نوجوان ہی ملک کا مستقبل ہیں، لیکن حکومت کی ’’غلط پالیسیوں‘‘ نے انہیں ’’مایوسی کے دلدل‘‘ میں دھکیل دیا ہے۔ انہوں نے الزام لگایا کہ فرقہ وارانہ جنون اور ’’ریوڑی کلچر‘‘ کی دوڑ میں نوجوانوں کی تعلیم اور روزگار کو سب سے زیادہ نظرانداز کیا گیا ہے۔

انہوں نے کہا، ’’گزشتہ 12 برسوں میں مودی حکومت نے نوجوانوں کا مستقبل تباہ کر دیا ہے۔‘‘ کھرگے نے الزام لگایا کہ تعلیمی اداروں پر راشٹریہ سویم سیوک سنگھ (آر ایس ایس) سے وابستہ لوگوں کا قبضہ ہو گیا ہے۔ انہوں نے کہا کہ تعلیم حاصل کرنے کے بعد ملازمت کی تلاش میں نکلنے والے نوجوانوں کو پرچہ لیک، بھرتی امتحانات میں مبینہ گھوٹالوں اور تقرریوں میں تاخیر کا سامنا کرنا پڑ رہا ہے۔

ان کے مطابق اس کا سب سے زیادہ اثر غریب اور کمزور طبقات سے تعلق رکھنے والے طلبہ پر پڑتا ہے۔ کھرگے نے کہا، ’’نوجوانوں میں پیدا ہونے والا غصہ کوئی ایک دن کا نہیں ہے اور حکومت کے پاس کبھی ان کی بات سننے کی فرصت نہیں رہی۔ مسئلے کا مستقل حل تلاش کرنے کے بجائے حکومت ہر بار عارضی اقدامات کرتی رہی، جس کی وجہ سے نوجوان سڑکوں پر اترنے پر مجبور ہوئے۔‘‘ ان کا کہنا تھا کہ کانگریس نے نوجوانوں کے مسائل کو اپنے ایجنڈے میں شامل کیا ہے اور راہل گاندھی نے ’’طلبہ کی گونج‘‘ پروگرام کے ذریعے ان کی آواز کو قومی سطح پر پہنچایا ہے۔

کھرگے نے حالیہ مانسون اجلاس کا ذکر کرتے ہوئے کہا کہ پارلیمنٹ میں کانگریس نے تعلیم اور امتحانات کے مسائل پر وسیع بحث، طلبہ کے ساتھ مبینہ زیادتی پر گفتگو اور جواب دہی طے کرنے کی کوشش کی، لیکن وزیر اعظم مودی اور وزیر داخلہ امت شاہ پورے مانسون اجلاس کے دوران سوالات سے بچتے رہے۔ انہوں نے اس بات پر زور دیا کہ کانگریس کو مستقبل کی تیاری کے لیے نوجوانوں کے حوالے سے ایک واضح، جامع اور وقت مقررہ پر مبنی ’’ایجوکیشن ٹو ایمپلائمنٹ روڈ میپ‘‘ تیار کرنا چاہیے۔ چین کے ساتھ سرحدی تنازع کا ذکر کرتے ہوئے کھرگے نے دعویٰ کیا کہ سرحد پر مبینہ تجاوزات سے متعلق سنگین حقائق سامنے آئے ہیں اور حکومت کو اس معاملے پر ایمانداری کے ساتھ اپنا موقف پیش کرنا چاہیے۔ انہوں نے الزام لگایا کہ حکومت نے ’’ذرائع کے پیچھے چھپتے ہوئے‘‘ ان خبروں کو غلط قرار دیا ہے۔

انہوں نے کہا، ’’قومی سلامتی پر سیاست نہیں ہونی چاہیے، لیکن قومی سلامتی کو کسی بھی سطح پر نظرانداز بھی نہیں کیا جانا چاہیے۔‘‘ کھرگے کا کہنا تھا کہ ملک کی سرحدوں کی حقیقی صورتحال جاننا شہریوں کا حق ہے۔ انہوں نے 2020 کی گلوان جھڑپ کے بعد وزیر اعظم مودی کے اس بیان کا بھی ذکر کیا، جس میں کہا گیا تھا کہ ’’نہ کوئی اندر آیا ہے اور نہ کوئی اندر گھسا ہوا ہے۔‘‘ انہوں نے کہا کہ چھ برس بعد بھی سرحد سے متعلق سنگین سوالات اٹھ رہے ہیں، لیکن حکومت واضح معلومات فراہم نہیں کر رہی ہے۔ کھرگے نے کہا کہ فوج اپنا کام بخوبی انجام دے رہی ہے اور کانگریس جوانوں کے حوصلے اور جذبے کو سلام کرتی ہے۔

انہوں نے کہا، ’’نوجوانوں کا مستقبل، عوام کا اعتماد اور ملک کی سرحدیں—ان تینوں کے مرکز میں ایک ہی سوال ہے کہ کیا یہ حکومت عوام کے اعتماد کے قابل ہے؟‘‘ کھرگے کے مطابق پارٹی کے سامنے فوری طور پر پانچ ریاستوں میں ہونے والے اسمبلی انتخابات کا چیلنج ہے اور ان کی تیاریاں شروع ہو چکی ہیں۔ کانگریس صدر نے اس موقع پر سابق وزیر اعظم راجیو گاندھی کو بھی یاد کیا اور کہا کہ انہوں نے اپنی پالیسیوں کے مرکز میں نوجوانوں کو رکھا تھا۔

انہوں نے کہا کہ راجیو گاندھی نے ووٹ دینے کی عمر 21 سال سے کم کرکے 18 سال کی، ملک کے ہر ضلع میں جواہر نوودیا ودیالیوں کا نیٹ ورک قائم کیا اور سوامی وویکانند کی یوم پیدائش کو قومی یومِ نوجوانان کے طور پر منانے کا آغاز کیا گیا۔ کھرگے نے کہا کہ بعد کی کانگریس حکومتوں نے ان اقدامات کو آگے بڑھایا اور متحدہ ترقی پسند اتحاد (یو پی اے) حکومت کے دوران تعلیم کے حق سے لے کر اداروں کی تعمیر اور ترقی تک کے کاموں کو رفتار ملی۔