منالی/ آواز دی وائس

کبھی سیاحوں سے گہما گہمی سے بھرا رہنے والا منالی آج خاموشی کی آغوش میں لپٹا ہوا دکھائی دے رہا ہے۔ ہماچل پردیش کے سیاحت کی ریڑھ کی ہڈی کہے جانے والے کُلّو–منالی میں اس بار مانسون کی بارش نے ایسا قہر ڈھایا کہ سیاحوں کی آمد تقریباً رک گئی ہے اور ہر جگہ سنّاٹا چھایا ہوا ہے۔ جہاں ہر سال 34 سے 40 لاکھ سیاح پہنچتے تھے، وہاں اس بار ریکارڈ گراوٹ درج کی گئی ہے۔ حالت یہ ہے کہ ہزاروں ہوٹل خالی پڑے ہیں، کروڑوں کے ریزورٹس پر تالے لگے ہوئے ہیں اور سیاحت سے جڑے ہزاروں لوگ بے روزگار ہو گئے ہیں۔

ہوٹل خالی، ٹیکسی کے پہیے رُکے

منالی کی مشہور مال روڈ، جو عام طور پر سیاحوں کی بھیڑ سے بھری رہتی تھی، اب سنسان نظر آتی ہے۔ یہاں اب صرف چند مقامی لوگ دکھائی دیتے ہیں، زیادہ تر دکانیں بند ہیں۔ مال روڈ کے ساتھ موجود ٹیکسی اسٹینڈ پر ہزاروں گاڑیاں کئی دنوں سے کھڑی ہیں۔ ہماچل پردیش ٹیکسی یونین کے صدر راجہ ٹھاکر بتاتے ہیں کہ منالی میں تقریباً 5500 ٹیکسیاں ہیں مگر اس سیزن میں کام تقریباً بند رہا۔ پہلے مئی میں ہندوستان–پاکستان جنگ کے خدشے کی وجہ سے بکنگ منسوخ ہوئی، پھر جون سے مسلسل بارش نے سیاحوں کو آنے سے روک دیا۔

بینک کی قسطیں بھرنا مشکل

ٹیکسی مالکان کے لیے بینک کی قسطیں بھرنا بھی مشکل ہو گیا ہے۔ منالی کے مہنگے اور لگژری ہوٹل بھی خالی پڑے ہیں، حالانکہ کرایہ آدھے سے بھی کم کر دیا گیا ہے لیکن سیاح نہیں آ رہے۔ یہاں قریب 4000 چھوٹے–بڑے ہوٹل ہیں۔ مقامی لوگ سیب اور سیاحت پر منحصر ہیں، لیکن مئی سے ستمبر تک بارش کی وجہ سے بکنگز منسوخ ہو گئیں۔ ہوٹلوں کے باہر یا تو سنّاٹا ہے یا تالے لگے ہیں۔ رزیجو بیاس ندی کے کنارے بنے کئی ہوٹل خطرے کی زد میں ہیں۔

درجن بھر سے زیادہ ہوٹل زمین دوز

منالی نگر پریشد کے سابق چیئرمین چمن کپور بتاتے ہیں کہ ہوٹل چاہے کھلے ہوں یا بند، اسٹاف کی تنخواہ اور بجلی کا بل دینا ہی پڑتا ہے۔ اوپر سے حکومت کی طرف سے ٹیکس اور سبسڈی ختم ہونے کی وجہ سے ہوٹل مالکان پر دوہری مار پڑ رہی ہے۔ ان کا کہنا ہے کہ جب تک منالی میں ایئرپورٹ نہیں بنے گا تب تک سیاحت کا فروغ ممکن نہیں۔ منالی میں درجن بھر سے زیادہ ہوٹل زمین دوز ہو چکے ہیں۔

لوگوں نے کیا بتایا

بیاس ندی کے کنارے بنے کئی ہوٹل بہہ گئے ہیں اور جو باقی بچی ہوئی جائیدادیں ہیں انہیں بھاری نقصان پہنچا ہے۔ بھان قصبے کے اجے ٹھاکر بتاتے ہیں کہ ان کا چھ کمروں والا ہوم اسٹے 25 تاریخ کو بیاس ندی میں آنے والے سیلاب میں بہہ گیا۔ انہوں نے کئی بار انتظامیہ سے ندی کے کنارے سی سی ٹی وی لگانے کی مانگ کی، مگر کوئی سنوائی نہیں ہوئی۔ اب ان کا گھر اور ہوم اسٹے دونوں تباہ ہو چکے ہیں۔