نئی دہلی :آل انڈیا مسلم پرسنل لا بورڈ نے اپنے اساسی اراکین امیر شریعت کرناٹک حضرت مولانا صغیر احمد رشادی اور ڈاکٹر محمد منظور عالم کی رحلت پر گہرے رنج و غم کا اظہار کیا ہے۔ بورڈ نے اسے ملک و ملت کے لیے ایک ناقابل تلافی نقصان قرار دیا ہے۔
آل انڈیا مسلم پرسنل لا بورڈ کے جنرل سکریٹری مولانا محمد فضل الرحیم مجددی نے ایک پریس بیان میں امیر شریعت کرناٹک حضرت مولانا صغیر احمد رشادی اور آئی او ایس کے سابق چیئرمین اور نامور مفکر ڈاکٹر محمد منظور عالم کی وفات پر گہرے صدمے کا اظہار کیا۔ انہوں نے کہا کہ یہ سانحہ ملک و ملت اور مسلم پرسنل لا بورڈ کے لیے ناقابل تلافی نقصان ہے۔
انہوں نے کہا کہ حضرت مولانا صغیر احمد رشادی ایک بلند پایہ عالم دین اور کرناٹک کی نہایت قابل احترام شخصیت تھے۔ وہ بنگلور کے اہم دینی ادارے دارالعلوم سبیل الرشاد کے مہتمم اور شیخ الحدیث تھے۔ وہ امارت شرعیہ کرناٹک کے امیر شریعت بھی تھے۔ ریاست کے تمام ملی حلقوں میں انہیں عزت و احترام کی نگاہ سے دیکھا جاتا تھا۔ ایک سال قبل ان ہی کی سرپرستی اور میزبانی میں دارالعلوم سبیل الرشاد میں آل انڈیا مسلم پرسنل لا بورڈ کا اجلاس عام نہایت حسن و خوبی کے ساتھ منعقد ہوا تھا۔ ان کے حسن انتظام اور میزبانی کو تمام اراکین اور مدعوئین نے سراہا تھا۔ ان کی وفات سے نہ صرف بورڈ بلکہ ملک و ملت کو بھی ناقابل تلافی نقصان پہنچا ہے۔
اسی طرح بورڈ کے ایک اور قدیم اساسی رکن ڈاکٹر محمد منظور عالم کے انتقال نے بھی ایک گہرا خلا پیدا کر دیا ہے۔ وہ انسٹی ٹیوٹ آف آبجیکٹیو اسٹڈیز اور متعدد ملی تنظیموں اور اداروں کے مؤسس تھے۔ وہ ایک متحرک اور فعال مفکر تھے۔ انہوں نے آئی او ایس کی صورت میں ایک مؤثر تحقیقی ادارہ اور تھنک ٹینک قائم کیا۔ یہ وقت کی ایک اہم ضرورت تھی۔ وہ اسلامی فقہ اکیڈمی اور آل انڈیا ملی کونسل کے بھی مؤسسین میں شامل تھے۔ ڈاکٹر محمد منظور عالم کئی دنوں سے شدید علیل تھے۔ اس کے باوجود وہ آخری سانس تک ملک و ملت کے اہم امور اور مسائل پر متوجہ رہے۔
مولانا محمد فضل الرحیم مجددی نے ان دونوں عظیم شخصیات کے لیے دعائے مغفرت کی۔ انہوں نے دعا کی کہ اللہ تعالی ان کی کوششوں کو قبول فرمائے۔ اللہ تعالی ان کی مغفرت فرمائے۔ اللہ تعالی انہیں جنت الفردوس میں اعلی مقام عطا فرمائے۔ اللہ تعالی ان کے اہل خانہ اور وابستگان کو صبر جمیل عطا فرمائے۔ اللہ تعالی ملت کو ان کا نعم البدل عطا فرمائے۔ آمین۔
