کلکتہ: کلکتہ ہائی کورٹ نے الیکشن کمیشن (EC) سے ترنمول کانگریس (TMC) کی اس شکایت پر غور کرنے کی درخواست کی ہے جس میں الزام لگایا گیا ہے کہ جنوبی 24 پرگنہ ضلع میں اسمبلی انتخابات کے لیے تعینات ایک پولیس مبصر نے قواعد کی خلاف ورزی کرتے ہوئے بھارتیہ جنتا پارٹی (بی جے پی) کے امیدوار سے ملاقات کی۔
ترنمول کانگریس نے چار اسمبلی حلقوں موگراہٹ ایسٹ، موگراہٹ ویسٹ، ڈائمنڈ ہاربر اور فالتا میں متعلقہ افسر کو پولیس مبصر کے عہدے سے ہٹانے کی درخواست کی ہے۔ الیکشن کمیشن نے عدالت میں مؤقف اختیار کیا کہ مبصر نے ڈائمنڈ ہاربر میں ریاستی حکومت کے ایک ٹورسٹ لاج میں واقع اجلاس کے لیے مخصوص کانفرنس روم میں اپنی سرکاری حیثیت میں امیدوار سے ملاقات کی تھی اور درخواست گزار کے الزامات کے برعکس اس ملاقات میں کوئی خفیہ یا غیر قانونی بات نہیں تھی۔
جسٹس کرشنا راؤ نے گزشتہ ہفتے دونوں فریقین کی سماعت کے بعد الیکشن کمیشن سے ترنمول کی شکایت پر غور کرنے اور درخواست گزار کو اس فیصلے سے آگاہ کرنے کی "درخواست" کی۔ ترنمول نے اپنی درخواست میں الزام لگایا ہے کہ متعلقہ افسر نے موگراہٹ ویسٹ اسمبلی حلقے سے بی جے پی امیدوار کے ساتھ نجی اور غیر رسمی ملاقات کی۔ الیکشن کمیشن کی نمائندگی کرنے والے سینئر وکیل ڈی ایس نائیڈو نے عدالت میں کہا کہ پولیس مبصر کے لیے ہدایت نامے کے مطابق وہ انتخابی عمل کے دوران الیکشن کمیشن کی "آنکھ اور کان" کے طور پر کام کرتا ہے اور براہ راست معلومات فراہم کرتا ہے۔
انہوں نے کہا کہ ایک پولیس مبصر کا عوام اور امیدواروں سے ملاقات کرنا اس کے فرائض کا حصہ ہے اور اس نے الیکشن کمیشن کو اپنی رپورٹ بھی پیش کرنی ہوتی ہے۔ نائیڈو نے مزید کہا کہ ترنمول کا یہ الزام کہ ملاقات ذاتی نوعیت کی تھی، بے بنیاد ہے کیونکہ ملاقات سرکاری حیثیت میں دیگر افراد کی موجودگی میں ہوئی تھی۔
