گوہاٹی: آسام کے وزیر اعلیٰ ہیمنت بسوا شرما نے جمعرات کو ریاست میں سیلاب سے متاثرہ جانوروں کے بچاؤ اور امدادی کاموں میں محکمۂ جنگلات کی مدد کرنے پر ونتارا فاؤنڈیشن کا شکریہ ادا کیا۔ وزیر اعلیٰ نے کہا کہ سیلاب سے مویشیوں اور جنگلی حیات کو شدید نقصان پہنچا ہے، لیکن قدرتی آفات کے دوران جانوروں کو بچانے کے کام پر اکثر مناسب توجہ نہیں دی جاتی۔

ہیمنت بسوا شرما نے سوشل میڈیا پلیٹ فارم ایکس پر ایک پوسٹ میں کہا، "آسام میں سیلاب کے اثرات کا ایک ایسا پہلو جس پر کم بات ہوئی ہے، لیکن جو نہایت افسوسناک ہے، وہ ہمارے مویشیوں اور جنگلی جانوروں کو پہنچنے والا نقصان ہے۔ ایک کروڑ سے زائد مویشی متاثر ہوئے ہیں، سیکڑوں جنگلی جانور سیلاب میں بہہ گئے ہیں، جبکہ بہت سے اب بھی پھنسے ہوئے یا لاپتا ہیں۔"

انہوں نے کہا کہ اگرچہ محکمۂ جنگلات نے بڑے پیمانے پر ریسکیو اور امدادی کارروائیاں شروع کی ہیں، لیکن بحران کی شدت کے پیش نظر مزید تعاون کی ضرورت ہے۔ وزیر اعلیٰ نے خصوصی جنگلی حیات ریسکیو ٹیم اور ایمبولینسوں کے بیڑے کے ذریعے ریاستی محکمۂ جنگلات کی مدد کرنے پر ونتارا فاؤنڈیشن کا خصوصی شکریہ ادا کیا۔

انہوں نے کہا، "قدرتی آفات کے دوران جانوروں کو بچانے کے کام پر عموماً اتنی توجہ نہیں دی جاتی جتنی دینی چاہیے۔ جو لوگ اس نیک مقصد کے لیے آگے آئے ہیں، ہم ان کی ستائش کرتے ہیں۔ جناب اننت امبانی کے اس ہمدردانہ اور قابلِ تحسین اقدام پر میں دل کی گہرائیوں سے ان کا شکریہ ادا کرتا ہوں۔" واضح رہے کہ آسام میں سیلاب کے باعث اب تک کم از کم 95 افراد ہلاک ہو چکے ہیں، جبکہ تقریباً 1.6 لاکھ افراد اس آفت سے متاثر ہوئے ہیں۔