نئی دہلی:  25 اگست 2026 کو چین کے دارالحکومت بیجنگ میں سرحدی مسئلے پر ہندوستان اور چین کے خصوصی نمائندوں (SR) کے درمیان بات چیت کا 25واں دور منعقد ہوا۔ چین کے خصوصی نمائندے، کمیونسٹ پارٹی آف چائنا (CPC) کی مرکزی کمیٹی کے پولیٹیکل بیورو کے رکن اور مرکزی کمیشن برائے خارجہ امور کے دفتر کے ڈائریکٹر وانگ یی، اور ہندوستان کے خصوصی نمائندے و قومی سلامتی کے مشیر اجیت ڈووال نے ہندوستان-چین سرحدی مسئلے پر کھل کر اور تفصیلی تبادلۂ خیال کیا۔ دونوں فریقوں نے مندرجہ ذیل آٹھ نکات پر نتائج اور اتفاقِ رائے حاصل کیا:

1۔ دونوں فریقوں نے دونوں ممالک کے رہنماؤں کی جانب سے دی گئی رہنمائی پر عمل کرنے، سرحدی علاقوں میں امن و سکون برقرار رکھنے اور دوطرفہ تعلقات کی صحت مند اور مستحکم ترقی کے لیے سازگار ماحول پیدا کرنے کے عزم کا اعادہ کیا۔

2۔ دونوں فریقوں نے 2005 میں طے پانے والے ’’ہندوستان-چین سرحدی مسئلے کے حل کے لیے سیاسی معیارات اور رہنما اصولوں سے متعلق معاہدے‘‘ اور اس کے بعد خصوصی نمائندوں کی بات چیت میں طے پانے والے اتفاقِ رائے کے مطابق سرحدی مسئلے کے حل کے لیے ایک فریم ورک پر مذاکرات آگے بڑھانے کے عزم پر زور دیا، تاکہ منصفانہ، معقول اور باہمی طور پر قابلِ قبول حل تلاش کیا جا سکے۔

3۔ ورکنگ میکانزم فار کنسلٹیشن اینڈ کوآرڈینیشن (WMCC) کے تحت سرحدی حد بندی سے متعلق ماہرین کا گروپ اور سرحدی انتظام سے متعلق ورکنگ گروپ بالترتیب سرحدی حد بندی اور سرحدی انتظام کے حوالے سے ابتدائی اور ٹھوس پیش رفت کے لیے بات چیت کو آگے بڑھائیں گے۔ دونوں گروپوں کا پہلا کام اپنے اپنے دائرۂ کار (Terms of Reference) پر اتفاق کرنا ہوگا۔

4۔ دونوں فریقوں نے اتفاق کیا کہ زمینی سطح پر پیدا ہونے والی کسی بھی صورتِ حال سے موجودہ سفارتی اور فوجی ذرائع کے ذریعے فوری طور پر نمٹا جائے گا، جن میں WMCC، مقامی کمانڈر سطح کے اجلاس اور دیگر متفقہ طریقۂ کار شامل ہیں، تاکہ زیرِ التوا مسائل کو حل کیا جا سکے اور لائن آف ایکچوئل کنٹرول (LAC) پر غلط فہمی اور غلط اندازے سے بچا جا سکے۔ دونوں فریقوں نے سرحدی انتظام کو بہتر بنانے کے لیے مناسب علاقوں میں LAC کی تفہیم کو بہتر بنانے کے طریقوں پر بھی تبادلۂ خیال کیا۔

5۔ سرحدی انتظام کے اقدامات کو بہتر بنانے کے مقصد سے دونوں فریقوں نے جنرل لیول میکانزم/سینئر ہائیسٹ ملٹری کمانڈر (SHMC) اجلاسوں کے انعقاد کے لیے مزید دو ملاقات کے مقامات پر اتفاق کیا۔ اسی طرح مشرقی اور وسطی سیکٹرز میں سرحدی فوجی ہاٹ لائن کے مزید دو چینلز قائم کرنے پر بھی اتفاق کیا گیا۔

6۔ دونوں فریقوں نے سرحد پار تعاون میں ہونے والی پیش رفت کا نوٹس لیا۔ ہندوستانی فریق نے چین کے خودمختار خطے تبت میں کائلاش-مانسروور یاترا (KMY) کے لیے ہندوستانی سرکاری یاتریوں کے مزید گروپوں کی تعداد بڑھانے کے لیے چینی فریق کی جانب سے کی جانے والی کوششوں کو سراہا۔ دونوں فریقوں نے تین نامزد سرحدی تجارتی مقامات دوبارہ کھولے جانے کا خیرمقدم کیا۔ دونوں ممالک نے سرحدی تجارت، یاترا اور دیگر شعبوں میں تبادلے اور تعاون کو مضبوط بنانے پر اتفاق کیا، تاکہ سرحدی علاقوں میں مکالمے، امن، مشاورت اور تعاون پر مبنی ماحول پیدا کرنے کے لیے مل کر کام کیا جا سکے۔

7۔ دونوں فریقوں نے سرحد پار دریاؤں سے متعلق ہندوستان-چین ماہر سطح کے میکانزم کا اگلا اجلاس ستمبر میں منعقد کرنے پر اتفاق کیا۔ اس کے ساتھ ہی ہائیڈرولوجیکل ڈیٹا کے تبادلے اور متعلقہ مفاہمت کی یادداشتوں (MoUs) کی تجدید سمیت دیگر امور پر رابطہ برقرار رکھنے پر بھی اتفاق کیا گیا۔

8۔ دونوں فریقوں نے خصوصی نمائندوں کی بات چیت کے 26ویں دور کا اجلاس 2027 میں ہندوستان میں منعقد کرنے پر اتفاق کیا۔