نئی دہلی/ آواز دی وائس

بہار اسمبلی انتخابات 2025 کے آخری مرحلے کی ووٹنگ جاری ہے، اور ریاست بھر میں ووٹروں میں زبردست جوش و خروش دیکھا جا رہا ہے۔ اسی دوران جن شکتی جنتا دل کے سربراہ اور مہوا اسمبلی سیٹ سے امیدوار تیج پرتاپ یادو نے کہا ہے کہ اس بار تبدیلی ضرور آئے گی اور خواتین بڑی تعداد میں ووٹنگ میں حصہ لے رہی ہیں۔

میڈیا سے بات چیت میں لالو پرساد یادو کے بڑے بیٹے تیج پرتاپ یادو نے کہا کہ ووٹنگ اپنے طریقے سے ہو رہی ہے اور لوگ بڑھ چڑھ کر ووٹ دے رہے ہیں۔ ووٹنگ کا فیصد بھی بڑھ رہا ہے۔ خواتین کی تعداد خاصی اچھی ہے، وہ جوش کے ساتھ ووٹ ڈال رہی ہیں۔ اس بار تبدیلی یقینی ہے۔ مہوا کا نتیجہ نمبر ون ہوگا۔ کس نے کتنا ترقیاتی کام کیا ہے، یہ بات 14 تاریخ کو عوام خود بتائے گی۔ مہوا ہمارا گڑھ ہے، یہ کسی اور کے نام سے نہیں بلکہ ہمارے نام سے جانا جاتا ہے۔

ہم کسی جماعت کو حمایت نہیں دے رہے :  تیج پرتاپ یادو

تیج پرتاپ یادو نے آگے کہا کہ جو کوئی بھی جرم کرتا ہے، انتظامیہ کو اسے پکڑنا ہی چاہیے۔ حمایت دینے کی کوئی بات نہیں ہے، ہم کسی سیاسی پارٹی یا اتحاد کو حمایت نہیں دے رہے۔ لیکن مجرم کو سخت سزا ملنی چاہیے۔ دہلی بم دھماکے کے بارے میں بات کرتے ہوئے تیج پرتاپ نے کہا کہ بم دھماکہ ہوا ہے تو حکومت کو اس کا سنجیدگی سے نوٹس لینا چاہیے۔ جو بھی اس کے پیچھے ہے، حکومت کو اسے گرفتار کرنا چاہیے۔ یہ سیکورٹی میں بڑی چوک ہے۔ حکومت کو فوری قدم اٹھانا ہی پڑے گا۔ بیرونِ ملک دورے تو سبھی کرتے ہیں، راہل گاندھی بھی جاتے ہیں۔ 14 تاریخ کو سب کو معلوم ہو جائے گا کہ حکومت کس کی بننے والی ہے۔

مہوا میں پہلے مرحلے میں ہوئی تھی ووٹنگ

مہوا اسمبلی سیٹ پر پہلے مرحلے میں ووٹنگ ہو چکی ہے، جہاں 54.88 فیصد ووٹنگ ریکارڈ ہوئی تھی۔ اس نشست سے تیج پرتاپ یادو میدان میں ہیں۔ ان کا سیدھا مقابلہ راشٹریہ جنتا دل (آر جے ڈی) کے امیدوار اور موجودہ رکنِ اسمبلی مکیش روشن سے ہے۔ اس کے علاوہ سنجے کمار (ایل جے پی-آر وی) اور اندرجیت پرادھان (جن سُراج پارٹی) کی موجودگی نے اس مقابلے کو مزید دلچسپ بنا دیا ہے۔