پناجی: تہلکہ کے سابق مدیر ترون تیج پال نے جمعرات کو کہا کہ وہ 2013 کے جنسی زیادتی کے مقدمے میں انہیں قصوروار قرار دینے والے بمبئی ہائی کورٹ کے فیصلے کے خلاف سپریم کورٹ سے رجوع کریں گے۔ ان کا کہنا تھا کہ ہائی کورٹ کا فیصلہ "غلط" ہے۔

بمبئی ہائی کورٹ کی گوا بنچ نے 2013 میں اپنی خاتون ساتھی کے ساتھ زیادتی کے مقدمے میں ترون تیج پال کو قصوروار قرار دیتے ہوئے گوا کی سیشن عدالت کی جانب سے پانچ سال قبل سنائے گئے بریت کے فیصلے کو کالعدم قرار دے دیا۔ سزا کے تعین سے قبل ترون تیج پال نے عدالت سے نرمی برتنے کی اپیل کرتے ہوئے کہا کہ وہ "سیاسی انتقام کا شکار" ہیں اور دو بیٹیوں کے والد ہیں۔

دوسری جانب گوا حکومت کی طرف سے پیش ہونے والے سالیسٹر جنرل تشور مہتا نے عدالت سے زیادہ سے زیادہ سزا دینے کی درخواست کرتے ہوئے کہا کہ اس سے یہ واضح پیغام جائے گا کہ "نہیں کا مطلب نہیں ہوتا ہے"۔ فیصلے کے بعد ہائی کورٹ کے باہر صحافیوں سے گفتگو کرتے ہوئے ترون تیج پال نے کہا، "ہم اس فیصلے کے خلاف اپیل کریں گے۔ ہمارا ماننا ہے کہ یہ فیصلہ درست نہیں ہے۔ ہم اس کے خلاف سپریم کورٹ جائیں گے۔"

جسٹس نیلا گوکھلے اور جسٹس امت جمسنڈیکر پر مشتمل ہائی کورٹ کی گوا بنچ نے کہا کہ سزا سے متعلق حکم دوپہر کے اجلاس میں سنایا جائے گا۔ عدالت نے ترون تیج پال کو تعزیراتِ ہند کی دفعات 376(2)(F) (اعتماد یا اختیار کے منصب پر فائز شخص کی جانب سے خاتون کے ساتھ زیادتی)، 354(A) (جنسی ہراسانی) اور 354(B) (کسی خاتون کے کپڑے اتارنے کی نیت سے اس پر مجرمانہ طاقت کا استعمال) کے تحت قصوروار قرار دیا ہے۔

دفعہ 376 کے تحت انہیں کم از کم 10 سال اور زیادہ سے زیادہ عمر قید کی سزا سنائی جا سکتی ہے۔ یہ مقدمہ ایک سابق جونیئر خاتون صحافی کے الزامات سے متعلق ہے، جن کا کہنا تھا کہ نومبر 2013 میں گوا میں منعقدہ تھنک فیسٹ پروگرام کے دوران ترون تیج پال نے ہوٹل کی لفٹ میں ان کے ساتھ جنسی زیادتی کی تھی۔