نئی دہلی: مارکسی کمیونسٹ پارٹی (سی پی آئی ایم) کے جنرل سیکریٹری ایم اے بیبی نے جمعرات کو تمل ناڈو کے گورنر آر این روی سے مطالبہ کیا کہ وہ جمہوری روایات کے مطابق ٹی وی کے کو حکومت بنانے کی دعوت دیں، کیونکہ وہ معلق اسمبلی میں سب سے بڑی جماعت ہے۔

تمل ناڈو میں سیاسی تعطل پر بات کرتے ہوئے سی پی آئی ایم کے جنرل سیکریٹری نے دلیل دی کہ واضح اکثریت نہ ہونے یا انتخابی اتحاد کے اکثریت تک نہ پہنچنے کی صورت میں آئینی روایت کے مطابق سب سے بڑی جماعت کے رہنما کو حکومت بنانے اور حلف لینے کی دعوت دی جانی چاہیے۔ انہوں نے 1996 میں بی جے پی کے رہنما اٹل بہاری واجپائی کو دی گئی دعوت کی مثال بھی دی۔

بی بی نے ‘پی ٹی آئی-ویڈیو’ سے گفتگو میں اس دعوت میں تاخیر پر سوال اٹھاتے ہوئے کہا کہ گورنر کا دفتر شک و شبہ سے بالاتر ہونا چاہیے۔ انہوں نے مطالبہ کیا کہ ٹی وی کے رہنما وجے کو اسمبلی میں اپنی اکثریت ثابت کرنے کے لیے مناسب وقت دیا جائے۔ سی پی آئی ایم کی پوزیشن واضح کرتے ہوئے بی بی نے تسلیم کیا کہ ان کا اتحاد ڈی ایم کے کے ساتھ انتخابات ہار گیا ہے۔

انہوں نے کہا کہ پارٹی قیادت اس غیر معمولی صورتحال میں آئندہ حکمت عملی پر بات کرنے کے لیے چنئی میں اجلاس کرے گی۔ تمل ناڈو میں 23 اپریل کو ہونے والے اسمبلی انتخابات میں ٹی وی کے نے 108 نشستیں حاصل کیں، تاہم حکومت بنانے کے لیے درکار 118 ارکان کے ہدف تک نہیں پہنچ سکی۔ کانگریس نے اپنے پانچ ارکان کے ساتھ وجے کی جماعت کو حمایت دی ہے۔