چنئی: تمل ناڈو کے وزیر اعلیٰ ایم کے اسٹالن نے ہفتے کے روز وزیراعظم نریندر مودی کو ایک خط لکھ کر کویمبتور اور مدورئی میں میٹرو ریل منصوبوں سے متعلق تجاویز کو مرکزی حکومت کی جانب سے مسترد کیے جانے پر شدید مایوسی ظاہر کی۔

اسٹالن نے وزیراعظم سے اس فیصلے پر دوبارہ غور کرنے کی اپیل کرتے ہوئے کہا کہ اس وجہ سے عوام میں زبردست ناراضگی پائی جاتی ہے۔ انہوں نے کہا کہ بڑے ’’ترقیاتی انجن‘‘ والے شہروں کے لیے اعلیٰ صلاحیت والا عوامی ٹرانسپورٹ نظام ضروری ہے۔ اسٹالن نے اس بات پر زور دیا کہ تمل ناڈو ملک کی سب سے زیادہ شہری آبادی والا ریاست ہے، جہاں فی کس نجی گاڑیوں کی تعداد کافی زیادہ ہے۔

انہوں نے بتایا کہ اسی ضرورت کو مدنظر رکھتے ہوئے ریاستی حکومت نے کویمبتور اور مدورئی میں میٹرو ریل منصوبوں کی ڈی پی آر (تفصیلی پروجیکٹ رپورٹ) تیار کر کے مرکزی وزارت برائے رہائش و شہری امور (MoHUA) کو منظوری کے لیے بھیجا، لیکن وزارت نے منصوبوں کو نامنظور کر دیا، جس سے ریاستی حکومت نے گہری مایوسی کا اظہار کیا۔

وزیر اعلیٰ نے کہا، ’’اس فیصلے نے دونوں شہروں کے لوگوں میں بےحد ناراضگی پیدا کر دی ہے۔ دیگر ریاستوں میں ایسے منصوبوں کو منظوری دی گئی، لیکن ہماری جائز ضروریات کو مسترد کر دیا گیا۔‘‘ اسٹالن نے یاد دلایا کہ وہ 24 مئی اور 26 جولائی 2025 کو وزیراعظم سے ملاقات کے دوران ان منصوبوں کی اہمیت خود ان کے سامنے رکھ چکے ہیں اور ایک میمورنڈم بھی پیش کر چکے ہیں۔

انہوں نے وزیراعظم سے درخواست کی کہ وہ وزارتِ شہری امور کو اس فیصلے پر ازسرنو غور کرنے کی ہدایت دیں، اور یہ بھی کہا کہ اگر ضرورت پڑی تو وہ اپنی ٹیم کے ساتھ نئی دہلی آکر تفصیل سے بات کرنے کے لیے تیار ہیں۔ انہوں نے کہا، ’’یہ دونوں منصوبے تمل ناڈو کے صنعتی اور ثقافتی مراکز کی خواہشات سے جڑے ہوئے ہیں، اس لیے میں امید کرتا ہوں کہ آپ اس معاملے میں ذاتی طور پر مداخلت کریں گے۔‘‘

اسٹالن نے منصوبوں کو نامنظور کرنے کے لیے وزارت کی جانب سے بتائے گئے وجوہات کو ’’غیرمنصفانہ‘‘ قرار دیا۔ اطلاعات کے مطابق، میٹرو ریل پالیسی 2017 میں 20 لاکھ آبادی کے معیار کو مسترد کرنے کی بنیادی وجہ بتایا گیا ہے۔ اسٹالن نے کہا، ’’میں اس بات کی وضاحت کرنا چاہتا ہوں کہ کویمبتور ایل پی اے (لوکل پلاننگ اتھارٹی) علاقے کی آبادی 2011 میں ہی 20 لاکھ سے تجاوز کر چکی تھی اور مدورئی کی آبادی بھی اس سے زیادہ ہونے کا اندازہ ہے۔‘‘

انہوں نے مزید کہا کہ اگر 20 لاکھ کی شرط کو یکساں طور پر نافذ کیا گیا ہوتا، تو آگرہ، اندور اور پٹنہ جیسے کئی ٹائر-2 شہروں میں میٹرو منصوبے کبھی مکمل نہیں ہو پاتے۔ اسٹالن نے کہا کہ ’’اس معیار کو تمل ناڈو کے لیے امتیازی طور پر استعمال کیے جانے‘‘ سے عوام میں یہ احساس پیدا ہوا ہے کہ ’’ہمارے شہروں کے ساتھ ناانصافی کی جا رہی ہے۔‘‘ انہوں نے مرکز سے اپیل کی کہ تمل ناڈو کے شہروں کے ساتھ بھی وہی برتاؤ کیا جائے جو اوپر مذکور شہروں کے ساتھ کیا گیا، تاکہ اس غلط تاثر کو دور کیا جا سکے۔