نئی دہلی: تمل ناڈو کے وزیر اعلیٰ سی جوزف وجے نے منگل کے روز جل شکتی وزارت اور مرکزی آبی کمیشن کی جانب سے ریاست کی عرضی پر غور کیے بغیر میکیداتو منصوبے کے لیے کرناٹک کی تجویز قبول کیے جانے پر حیرت ظاہر کی۔

انہوں نے وزیر اعظم نریندر مودی کو لکھے گئے ایک خط میں یہ درخواست بھی کی کہ وہ متعلقہ حکام کو کرناٹک کی جانب سے تیار کردہ تفصیلی پروجیکٹ رپورٹ کو مسترد کرنے کی ہدایت دیں، کیونکہ یہ کاویری آبی تنازع ٹریبونل کے حکم اور سپریم کورٹ کے فیصلے کے خلاف ہے۔

انہوں نے مزید کہا کہ وزیر اعظم مودی کو کرناٹک حکومت کو مشورہ دینا چاہیے کہ وہ دریائی خطے کی دیگر ریاستوں کی رضامندی کے بغیر کوئی نئی اسکیم شروع نہ کرے اور سپریم کورٹ کے فیصلے کی خلاف ورزی نہ کرے۔ خط میں وجے نے کہا کہ کاویری ندی پر میکیداتو آبی ذخیرے کے سنگ بنیاد رکھنے کے اعلان اور کرناٹک کے نائب وزیر اعلیٰ ڈی کے شیوکمار کے بیانات نے تمل ناڈو کے لاکھوں کسانوں میں شدید تشویش پیدا کر دی ہے، جو اپنی روزی روٹی کے لیے کاویری ندی پر انحصار کرتے ہیں۔

وزیر اعلیٰ نے کہا، آپ بخوبی واقف ہوں گے کہ کاویری آبی تنازع جیسے حساس مسئلے کا حل تقریباً تین دہائیوں تک جاری قانونی جدوجہد کے بعد نکلا تھا اور 16 فروری 2018 کے فیصلے پر فی الحال عمل درآمد کیا جا رہا ہے۔‘