نئی دہلی: کانگریس کے سابق صدر راہل گاندھی نے آوارہ کتوں پر سپریم کورٹ کے فیصلے پر ردعمل ظاہر کیا ہے۔ دہلی-این سی آر سے تمام آوارہ کتوں کو ہٹانے کے سپریم کورٹ کے فیصلے پر انہوں نے کہا کہ یہ دہائیوں سے جاری انسانی اور سائنسی پالیسی کو پیچھے لے جانے والا قدم ہے۔

یہ بے زبان روحیں کوئی مسئلہ نہیں ہیں جنہیں مٹا دیا جائے۔ پناہ گاہ، نس بندی، ویکسینیشن اور کمیونٹی کیئر کے ذریعے سڑکوں کو بغیر کسی ظالمانہ رویے کے محفوظ رکھا جا سکتا ہے۔ اس پر مکمل پابندی ظالمانہ اور کم فہمی پر مبنی ہے اور یہ ہماری ہمدردی کو ختم کرتا ہے۔ ہم یہ یقینی بنا سکتے ہیں کہ عوامی تحفظ اور جانوروں کی فلاح دونوں ساتھ ساتھ چلیں۔

صرف راہل گاندھی ہی نہیں بلکہ مینکا گاندھی نے بھی سپریم کورٹ کے اس حکم پر سوال اٹھائے ہیں۔ مینکا گاندھی نے کہا، دہلی میں تین لاکھ آوارہ کتے ہیں۔ ان سب کو پکڑ کر شیلٹر ہوم بھیجا جائے گا۔ ان کو سڑکوں سے ہٹانے کے لیے دہلی حکومت کو ایک ہزار یا دو ہزار شیلٹر ہوم بنانے ہوں گے، کیونکہ زیادہ کتوں کو ایک ساتھ نہیں رکھا جا سکتا۔

سب سے پہلے اس کے لیے زمین تلاشنی ہوگی۔ اس پر چار سے پانچ کروڑ روپے کا خرچ آئے گا، کیونکہ ہر مرکز میں کیئر ٹیکر، کھانا بنانے اور کھلانے والے، اور چوکی دار کا انتظام کرنا ہوگا۔ انہوں نے کہا، سپریم کورٹ کا یہ حکم شاید غصے میں اور عملی پہلوؤں پر غور کیے بغیر دیا گیا ہو۔

انہوں نے اس فیصلے کی قانونی حیثیت پر بھی سوال اٹھایا اور کہا کہ ایک مہینہ پہلے ہی سپریم کورٹ کے ایک اور بینچ نے اسی معاملے پر ایک متوازن فیصلہ سنایا تھا۔ اب، ایک مہینے بعد، دو رکنی بینچ نے ایک اور فیصلہ سنایا ہے جس میں کہا گیا ہے کہ سب کو پکڑو۔ کون سا فیصلہ درست ہے؟ ظاہر ہے پہلا والا، کیونکہ وہ ایک قائم شدہ فیصلہ ہے۔ صرف سیاست دان ہی نہیں بلکہ عام عوام بھی سپریم کورٹ کے اس فیصلے سے ناخوش ہیں اور اس کی جھلک سوشل میڈیا پر دیکھی جا سکتی ہے۔

سوشل میڈیا پر لوگ سپریم کورٹ کے اس فیصلے کے خلاف آواز بلند کر رہے ہیں۔ تاہم، کچھ لوگ ایسے بھی ہیں جو سپریم کورٹ کے اس فیصلے کا خیر مقدم کر رہے ہیں۔ واضح رہے کہ سپریم کورٹ نے آٹھ ہفتوں کے اندر تمام آوارہ کتوں کو سڑکوں سے ہٹانے کا حکم دیا ہے۔