نئی دہلی: سپریم کورٹ نے جمعہ کے روز دہلی-این سی آر کے ڈاگ شیلٹرز سے آوارہ کتوں کو چھوڑنے پر 11 اگست کو دیے گئے اپنے سابقہ حکم میں ترمیم کر دی۔ عدالت نے کہا کہ پکڑے گئے کتوں کو نس بندی اور ویکسینیشن کے بعد وہیں چھوڑ دیا جائے، جہاں سے انہیں اٹھایا گیا تھا۔

جسٹس وکرم ناتھ کی سربراہی میں تین ججوں کی خصوصی بنچ نے واضح کیا کہ یہ حکم ریبیز سے متاثرہ، ریبیز کا شبہ رکھنے والے یا جارحانہ رویے والے کتوں پر لاگو نہیں ہوگا۔ جسٹس سندیپ مہتا اور جسٹس این وی انجاریا کی بنچ نے کہا کہ ڈاگ شیلٹرز سے آوارہ کتوں کو چھوڑنے پر عارضی طور پر لگائی گئی پابندی کو ملتوی رکھا جائے گا۔ بنچ نے میونسپل کارپوریشن حکام کو ہدایت دی کہ وہ مخصوص فوڈ زونز بنائیں جہاں لوگ آوارہ کتوں کو کھانا کھلا سکیں۔

بنچ نے کہا کہ یہ فوڈ زونز میونسپل وارڈز میں آوارہ کتوں کی تعداد اور گنجانی کو مدنظر رکھ کر بنائے جائیں گے۔ عدالت نے صاف طور پر کہا کہ سڑکوں پر آوارہ کتوں کو کھانا کھلانے کی اجازت نہیں ہوگی۔ بنچ نے مزید کہا کہ فوڈ زونز کے قریب نوٹس بورڈ لگائے جائیں گے، جن پر واضح طور پر درج ہوگا کہ آوارہ کتوں کو صرف انہی مخصوص علاقوں میں کھانا کھلایا جائے گا۔

اگر کوئی شخص سڑک پر آوارہ کتوں کو کھانا کھلاتا ہوا پایا گیا تو اس کے خلاف قانونی کارروائی کی جائے گی۔ عدالت نے یہ بھی حکم دیا کہ اگر کوئی سرکاری ملازم اپنی ڈیوٹی ادا کرنے سے روکا گیا تو وہ شخص اس کے لیے ذمہ دار ہوگا۔ عدالت نے یہ بھی کہا کہ جانوروں سے محبت کرنے والے افراد آوارہ کتوں کو گود لینے کے لیے ایم سی ڈی کے پاس درخواست دے سکتے ہیں۔

بنچ نے اس معاملے کا دائرہ پورے ہندوستان میں بڑھاتے ہوئے تمام ریاستوں اور مرکز کے زیر انتظام علاقوں کو فریق بنایا اور ملک بھر کی مختلف ہائی کورٹس میں آوارہ کتوں سے متعلق زیر التواء درخواستوں کو سپریم کورٹ میں منتقل کر لیا۔ یہ حکم 11 اگست کے ہدایت نامے پر پابندی کی درخواست پر دیا گیا۔ عدالت نے اگلی سماعت آٹھ ہفتوں بعد مقرر کی ہے۔

اس سے قبل، سپریم کورٹ نے 28 جولائی کو ایک میڈیا رپورٹ پر از خود نوٹس لیتے ہوئے دہلی میں آوارہ کتوں کے کاٹنے سے بچوں میں ریبیز کے خطرے پر توجہ دی تھی۔ اس کیس میں 11 اگست کو عدالت کی دو رکنی بنچ نے کئی ہدایات جاری کی تھیں، جن کے تحت دہلی، نوئیڈا، غازی آباد، گڑگاؤں اور فرید آباد کے حکام کو ہدایت دی گئی تھی کہ وہ فوری طور پر آوارہ کتوں کو پکڑ کر انہیں شیلٹر ہاؤسز میں منتقل کریں۔