نئی دہلی: سپریم کورٹ نے جمعہ کو گراسِم انڈسٹریز پر 301.6 کروڑ روپے کے جرمانے کو منسوخ کرنے کے نیشنل کمپنی لا اپیلیٹ ٹریبونل (این سی ایل اے ٹی) کے فیصلے کو برقرار رکھتے ہوئے کمپیٹیشن کمیشن آف انڈیا (سی سی آئی) کی اپیل مسترد کر دی۔ ساتھ ہی عدالت نے منصفانہ مسابقت کے نگران ادارے سی سی آئی کو ہدایت دی کہ وہ وسکوس اسٹیپل فائبر (VSF) کی مارکیٹ میں مبینہ اجارہ داری کے معاملے کی دوبارہ سماعت کرے۔

جسٹس جے بی پاردی والا اور جسٹس کے وِنود چندرن پر مشتمل بنچ نے سی سی آئی کی اس اپیل کو خارج کر دیا، جس میں اس نے 5 مئی کو این سی ایل اے ٹی کے فیصلے کو چیلنج کیا تھا۔ این سی ایل اے ٹی نے اپنے فیصلے میں کہا تھا کہ سی سی آئی نے اپنے تحقیقاتی شعبے کے ڈائریکٹر جنرل (ڈی جی) کی رپورٹ سے مختلف مؤقف اختیار کیا، لیکن اس کے باوجود گراسِم انڈسٹریز کو اپنا موقف پیش کرنے کا مناسب موقع نہیں دیا۔

سی سی آئی نے مارچ 2020 میں گراسِم انڈسٹریز پر یہ جرمانہ اس الزام میں عائد کیا تھا کہ اس نے ہندوستان میں وسکوس اسٹیپل فائبر (VSF) کی سپلائی کے معاملے میں اپنی غالب مارکیٹ پوزیشن کا ناجائز فائدہ اٹھایا۔ ٹیکسٹائل صنعت میں اسپنرز سے مراد وہ ملیں یا کمپنیاں ہیں جو کپاس، وسکوس یا پالئیےسٹر جیسے خام ریشوں سے دھاگا تیار کرتی ہیں۔ گراسِم نے سی سی آئی کے فیصلے کو این سی ایل اے ٹی میں چیلنج کیا تھا، جہاں ایسے فیصلوں کے خلاف اپیل کی جا سکتی ہے۔

ٹریبونل نے سی سی آئی کو معاملے کی نئے سرے سے سماعت کرنے کی ہدایت دی تھی۔ این سی ایل اے ٹی کی دو رکنی بنچ نے کہا تھا کہ رعایتی اور قیمتوں کی پالیسی سے متعلق انکشافات اور وی ایس ایف خریدنے والے تاجروں کو فروخت کے معاملے میں سی سی آئی نے ڈائریکٹر جنرل کی رپورٹ سے مختلف رائے اختیار کی، اس لیے کمپنی کو سنے بغیر فیصلہ دینا مناسب نہیں تھا۔

ٹریبونل نے اپنے سابقہ فیصلوں کا حوالہ دیتے ہوئے کہا تھا کہ جب سی سی آئی اور اس کے ڈائریکٹر جنرل کے نتائج میں اختلاف ہو تو متاثرہ فریق کو سماعت کا پورا موقع دینا لازمی ہے۔ سی سی آئی نے اپنے اصل حکم میں کہا تھا کہ گراسِم نے ہندوستان میں وی ایس ایف خریدنے والے صارفین سے امتیازی قیمتیں وصول کر کے اور ان پر اضافی شرائط عائد کر کے اپنی غالب مارکیٹ پوزیشن کا غلط استعمال کیا۔

کمیشن نے کمپنی کو غیر منصفانہ اور امتیازی قیمتوں کی پالیسی ترک کرنے اور خریداروں سے وی ایس ایف کے استعمال کی تفصیلات طلب کرنا بند کرنے کی بھی ہدایت دی تھی۔ وسکوس اسٹیپل فائبر (VSF) ایک ہمہ مقصدی، حیاتیاتی طور پر تحلیل ہونے والا سیلولوزی ریشہ ہے، جس کا استعمال ملبوسات، گھریلو ٹیکسٹائل اور غیر بُنے ہوئے صفائی سے متعلق مصنوعات کی تیاری میں بڑے پیمانے پر کیا جاتا ہے۔ نرم ساخت اور زیادہ جذب کرنے کی صلاحیت کی وجہ سے اسے اکثر کپاس، پالئیےسٹر یا لینن کے ساتھ ملا کر استعمال کیا جاتا ہے تاکہ کپڑے کے آرام، مضبوطی اور معیار میں اضافہ ہو۔