نئی دہلی: سپریم کورٹ نے منگل کے روز کہا کہ کسی بھی شخص کو مناسب عمل اور قانون کے بغیر اس کی جائیداد سے محروم نہیں کیا جا سکتا۔ جسٹس دنیش مہیشوری اور جسٹس وکرم ناتھ کی بنچ نے کہا کہ آئین کا آرٹیکل اے300 بنیادی حق نہیں ہے لیکن اسے آئینی یا قانونی حق کا درجہ حاصل ہے۔

اس کے مطابق قانون کے بغیر کسی شہری کو اس کی جائیداد سے محروم نہیں کیا جا سکتا۔ سپریم کورٹ نے کہا، کسی شخص کو کئی طریقوں سے اس کی جائیداد سے محروم کیا جا سکتا ہے جیسے حصول، تحفہ یا منتقلی یا دیگر ضروری عمل کے ذریعے۔

سپریم کورٹ نے کیرالہ ہائی کورٹ کے حکم کے خلاف کلیانی کے قانونی نمائندوں کی طرف سے دائر کی گئی اپیل کی اجازت دیتے ہوئے یہ مشاہدات کئے۔

ہائی کورٹ نے سڑک کو چوڑا کرنے کے لیے سلطان باتھری میونسپلٹی کے ذریعہ ان کی 1.7 ہیکٹر اراضی پر قبضہ کرنے کے بدلے میں معاوضے کے ان کے دعووں کو مسترد کر دیا تھا۔ ہائی کورٹ نے پنچایت کے اس اعتراض پر انحصار کیا کہ انہوں نے اپنی زمین رضاکارانہ طور پر عطیہ کی تھی۔

بنچ نے کہا کہ اپیل کنندہ کسان ہیں اور استعمال شدہ زمین زرعی زمین ہے۔ یہ ان کی معاش کا حصہ تھی۔ قانون کی عملداری کے بغیر انہیں ان کی روزی روٹی اور جائیداد کے کچھ حصے سے محروم کرنا آئین کے آرٹیکل 21 اور آرٹیکل 300 اے کی خلاف ورزی ہے۔

سپریم کورٹ نے ہائی کورٹ کے ڈویژن بنچ کے فیصلے کو کالعدم قرار دیتے ہوئے سنگل بنچ کا فیصلہ بحال کر دیا۔ سنگل بنچ نے پنچایت، جسے میونسپلٹی میں تبدیل کیا گیا تھا، کو ہدایت دی تھی کہ وہ جائیداد کی مارکیٹ ویلیو کا پتہ لگانے کے بعد کلکٹر کے ذریعہ مقرر کردہ رقم کسانوں کو ادا کرے۔